Häzirki wagtda dünýäniň öňdebaryjy ýurtlarynda giňden peýdalanylýan sanly ykdysadyýetiň biziň ýurdumyzda-da ornaşdyrylmagy ösüş-özgerişli ýolumyzda möhüm ädim boldy. 2019-njy ýylda Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasy kabul edildi. Bu resminamanyň çäklerinde milli ykdysadyýetimizi we beýleki ulgamlary sanly ulgama geçirmek bilen bagly işler giňden ýaýbaňlandyryldy. Hormatly Prezidentimiz öňdebaryjy ulgamyň ornaşdyrylmagynyň meselelerine uly üns berip, bu babatda anyk wezipeleri öňde goýýar.

Sanly ykdysadyýetiň ornaşdyrylmagy, ilkinji nobatda, ýurdumyzda munuň üçin zerur bolan kompýuter tehnologiýalarynyň öndürilmegi bilen gönüden-göni baglydyr. Bu ugurda kompýuter tehnologiýalarynyň milli öndürijisi «Agzybirlik tilsimaty» bilelikdäki kärhanasyna hem aýratyn orun degişlidir.

«Agzybirlik tilsimaty» hojalyk jemgyýeti 2018-nji ýylda esaslandyryldy. Bu hojalyk jemgyýetini esaslandyryjy Türkmenistanyň Söwda we daşary ykdysady aragatnaşyklar ministrliginiň Kompýuter tilsimaty merkezi bilen «Hengsheng Lianhua Investment Management Co.,Ltd» atly Hytaý kompaniýasydyr.

Bilelikde döredilen bu hojalyk jemgyýeti kompýuter we elektronika önümleriniň önümçiligi üçin niýetlenendir. Häzirki wagtda «Agzybirlik tilsimaty» kärhanasynda onlarça işgär zähmet çekýär. Bu ýerde işleýän hünärmenleriň ählisinde dünýäniň öňdebaryjy kompýuter we elektronika öndürijileri tarapyndan berlen halkara derejeli sertifikatlar bardyr.

Häzirki wagtda hytaýly hyzmatdaşlar bilen bilelikde elektron pudagyny ösdürmek boýunça döwlet maksatnamasyny üstünlikli durmuşa geçirmegi esasy maksat edinen «Agzybirlik tilsimaty» bilelikdäki kärhanasy noutbuklary, planşetleri, monobloklary, şahsy kompýuterleri, interaktiw sensor panelleri  we  çylşyrymly programma üpjünçilik ulgamly serwerleri öndürmek boýunça iş alyp barýar. Mundan başga-da, bilelikdäki kärhanada şahsy komputerler, monobloklar, noutbuklar, söwdany awtomatlaşdyrmaga niýetlenilen kompýuter enjamlar hem-de ulgamlaýyn dolandyryjy kommutatorlar öndürilýär.

Mahlasy, «Agzybirlik tilsimaty» bilelikdäki kärhanasy, «Aýdyň gijeler» hojalyk jemgyýeti ýaly milli kompýuter öndürijilerimiziň ýurdumyzda sanly ulgamy ornaşdyrmakda, sanly ykdysadyýete geçmekde goşantlary uludyr. Bu ugurda ähli mümkinçilikleri döredip berýän Arkadagly Gahryman Serdarymyzyň jany sag bolsun!

Şemşat Jumaýewa,
Ý.Kakaýew adyndaky Halkara nebit we gaz uniwersitetiniň
sanly tehnologiýalar we kiberhowpsuzlyk fakultetiniň 1-nji ýyl talyby.