Suw — ýaşaýşyň gözbaşydyr. Tebigatyň bu täsin baýlygy adamzat üçin diňe bir jan saklaýjy serişde bolmak bilen çäklenmän, ösümlikleriň, haýwanlaryň, hatda bütin ekologiýa ulgamynyň durnuklylygyny üpjün edýän esasy çeşmedir. Häzirki wagtda tebigy arassa suwlaryň gymmaty has-da ýokarlanýar, sebäbi olaryň möçberi çäkli, talap bolsa günsaýyn artýar.

Tebigy suwlar diňe bir arassalygy bilen tapawutlanman, minerallar we adam bedenine peýdaly maddalar bilen baýlaşdyrylandyr. Şäherlerde ulanylýan suwlaryň köpüsi howpsuz bolsa-da, olaryň düzüminde himiki serişdeler ulanylýar, tebigy suw bolsa hili we tagamy bilen tapawutlanýar. Şu sebäpden tebigy çeşmelerdäki suwlar adam saglygy üçin has peýdalydyr.

Dünýäde suwuň 97%-i deňiz we ummanlardan ybarat bolup, diňe 3%-i içmäge ýaramlydyr. Munuň-da köp bölegi buzluklarda we elýetersiz ýerlerde saklanýar. Şonuň üçin tebigy arassa suwlaryň möçberi juda az. Ilat köpelmegi, senagatda ulanylyş, howanyň üýtgemegi we ekologiýa hapalanmasy suw çeşmeleriniň peselmegine getirýär.

Tebigy arassa suw adamyň saglygyny saklamakda möhüm rol oýnaýar. Ol:

Adam bedeniniň durnukly işlemegi üçin gerekdir. Suw bedendäki toksinleriň çykarylmagyna kömek edýär. Immuniteti güýçlendirýär. Tebigy minerallar hassalyklara garşy göreşmek ukybyny artdyrýar. Adam ömrüni uzaldýar. Arassa suw içmek ýürek-damar we böwrek keselleriniň öňüni almakda kömek edýär.

Tebigy suwlaryň çäkli möçberini gorap saklamak adamzat üçin uly jogapkärçilikdir. Biziň şu aşakdaky çäreleri ýerine ýetirmegimiz zerurdyr:

1. Suwa tygşytly çemeleşmek: Suwy tygşytly ulanyp, ony isrip etmekden saklanmaly.

2. Hapalanmagyň öňüni almak: Suw çeşmelerini himiki serişdelerden we zyňyndylardan goramak gerek.

3. Täzelenýän çeşmeleri döretmek: Täze suw saklaýjy desgalary gurup, howanyň üýtgemegine uýgunlaşmaly.

Tebigy arassa suwlaryň gymmatlygyny ýitirmezlik we olary geljekki nesiller üçin gorap saklamak adamzadyň iň möhüm wezipeleriniň biri bolmalydyr. Her bir damja suwuň adam durmuşyndaky ähmiýetini duýup, ony goramak işine goşant goşmak biziň her birimiziň borjumyzdyr.

Atageldi Agageldiyew,
S.A.Nyýazow adyndaky Türkmen oba hojalyk uniwersitetiniň
Gidromeliorasiýa fakultetiniň 4-nji ýyl talyby.