Ata Watanymyz Türkmenistanyň ýüregi hasaplanylýan mermer paýtagt şäherimiz Aşgabat gözellikler mekanydyr. Paýtagtlar içinde iň seresi, “aşyklaryň şäheri” bolan Aşgabady bu günki günde görmäge göz, taryplamaga söz ýetmese gerek. Garaşsyzlyk ýyllary içinde ýurdumyzda ýetilen belent sepgitleri gözel paýtagtymyzyň mysalynda görmek bolýar. Aşgabat berkarar döwletiň täze eýýamynyň Galkynyşy döwründe ýurdumyzyň ykdysady, syýasy, medeni ösüşlerini, özgerişlerini, jemgyýetimizde ýetilen belent sepgitleri, halkymyzyň hal-ýagdaý derejesini aýdyň görkezýär. Gahryman Arkadagymyzyň we Arkadagly Gahryman Serdarymyzyň öňe süren başlangyçlary netijesinde gurlan enaýy desgalaryň birnäçesiniň esasynda Ak şäherimiz Aşgabat Ginnesiň Bütindünýä rekordlar kitabynda mynasyp orun gazanmagy başardy.

Aşgabat - sebitde ylalaşdyryjy merkezdir.  Aşgabat – Aziýanyň merjen şäheridir. Ykdysady-geografiki taýdan juda amatly ýerde ýerleşenligi sebäpli demir, awto we howa ýollarynyň çatrygydyr. Aşgabadyň Syýahatçylyk şäherleriniň Bütindünýä Federasiýasynyň agzalygyna kabul edilmegi, ýurdumyzyň halkara abraýyny ýene-de bir gezek beýgeltdi. Häzirki wagtda Aşgabat ýurdumyzyň ylym, bilim medeniýet, ykdysady, syýasy merkezidir. Paýtagtymyzyň toplumlaýyn ösüşleri her bir ynsanyň göwün guşuny günden-güne ganatlandyrýar. Çünki, ýurdumyzyň paýtagty bu günki günde dünýäniň üns merkezinde saklanýar. Paýtagt şäherimiz gün-günden gözelleşýär. Dünýä ülňülerine laýyk gelýän ylmy merkezler, döwrebap ýaşaýyş jaýlary, iri göwrümli okuw jaýlary, beýik binalar, suw çüwdürimleri we beýleki desgalar onuň gözelligine has hem gözellik goşýar.

Her ýyl tutuş ýurdumyz boýunça 25-nji maý Aşgabat şäheriniň döredilen güni hökmünde baýramçylyk çäreleri gurnalýar. Milli Liderimiziň “Ak şäherim  Aşgabat” atly döreden paýhasly kitabynda Aşgabat şäheriniň taryhy we şu güni barada giňden ýazylyp beýan edilendir. Bu ajaýyp kitapda Gahryman Arkadagymyz Ak şäherimiz Aşgabada bolan söýgüsini giňişleýin beýan edip geçýär.

Ogulgeldi ANNAÝEWA
Myrat Garryýew adyndaky
Türkmenistanyň Döwlet lukmançylyk
uniwersitetiniň Patologik fiziologiýa
kafedrasynyň mugallymy