18 — 27-nji noýabr aralygynda Aşgabat şäherinde Ýewropa Bileleşiginiň Medeniýet hepdeligi dowam edýär. Bu çäre Ýewropa Bileleşiginiň Türkmenistandaky wekilhanasy, Germaniýanyň ilçihanasy we Türkmenistanyň Medeniýet ministrligi tarapyndan guraldy. Maksat, Ýewropa ýurtlarynyň medeniýetini Türkmenistanda tanyşdyrmak we iki tarapyň medeni-ynsanperwer gatnaşyklaryny pugtalandyrmakdyr.

22-nji noýabrda Magtymguly adyndaky milli sazly drama teatrynda Germaniýanyň «Klenke» kirişli saz toparynyň hem-de opera aýdymçysy Narine Ýegiýanyň çykyşlary boldy. Döredijilik topary Germaniýanyň nusgawy sazlaryny ýokary ussatlyk bilen ýerine ýetirip, tomaşaçylaryň ýokary baha bermeklerine mynasyp boldular. 24-nji noýabrda bolsa Italiýanyň «Antonio Flinta Trio» jaz topary özboluşly eserlerini türkmen tomaşaçylaryna hödürledi. Italiýaly we türkmen sazandalarynyň bilelikdäki çykyşlary tomaşaçylarda ýatdan çykmajak täsir galdyrdy.

Medeniýet hepdeliginiň dowamynda döredijilik toparlary paýtagtymyzyň medeni merkezlerinde we okuw mekdeplerinde ussatlyk sapaklaryny geçirdiler. Mundan başga-da, 25 — 27-nji noýabr aralygynda «Aşgabat» kinoteatrynda we Fransiýanyň ilçihanasynyň Fransuz institutynda ýewropa filmleri we multfilmleri görkezildi.

Bu çäre, Ýewropa bilen Türkmenistanyň arasyndaky medeni gatnaşyklaryň täze tapgyryny açyp, jemgyýetiň arasynda uly gyzyklanma döretdi.

Selbi Öräýewa 
Beki Seýtäkow adyndaky Mugallymçylyk mekdebiniň 2-nji ýyl talyby.