Türkmen we özbek halklarynyň gadymy taryhy, urp-adatlary, milli däp-dessurlary biri-birine juda ýakyn. Yzygiderli geçirilýän Medeniýet günleriniň iki ýurduň arasyndaky medeni gatnaşyklary ösdürmekde aýratyn ähmiýeti bar. Şu ýylyň 18 ― 20-nji noýabrynda Özbegistan Respublikasynyň Türkmenistandaky Medeniýet günleriniň geçirilmegi döwletara gatnaşyklarda medeni diplomatiýa möhüm ornuň degişlidigini görkezýär.

Türkmenistan bilen Özbegistan Respublikasynyň arasyndaky gatnaşyklar ugurlaryň giň gerimi boýunça yzygiderli ösdürilýär. Ýurdumyzda goňşy döwletiň nobatdaky Medeniýet günleriniň geçirilmegi hem şunda medeni-ynsanperwer hyzmatdaşlygyň aýratyn orun tutýandygyna şaýatlyk edýär. Şunda Daşkentde «Aşgabat», Aşgabatda-da «Daşkent» seýilgähiniň bardygyny aýratyn bellemelidiris.

Şu gezekki Medeniýet günleriniň çäklerinde ― 19-njy noýabrda Döwlet medeniýet merkeziniň Döwlet kitaphanasynda iki ýurduň ýazyjylarynyň we şahyrlarynyň gatnaşmagynda Gündogaryň beýik akyldary Magtymguly Pyraga bagyşlanan döredijilik duşuşygynyň guralmagy möhüm ähmiýetlidir. Munuň özi dana Pyragynyň özbek edebiýatynda we medeniýetinde aýratyn orun tutýandygyny görkezýär.

19-njy noýabrda köpöwüşginli sungat baýramçylygy paýtagtymyzdaky «Daşkent» dynç alyş seýilgähinde Özbegistanyň sungat ussatlarynyň konserti bilen utgaşdy. Bu ýerde özbek lybaslarynyň görkezilişi, milli tagamlaryň we amaly-haşam sungatynyň eserleriniň sergisi hem ýaýbaňlandyryldy.

Lebap welaýatynyň Türkmenabat şäherinde geçirilen Türkmenistanyň we Özbegistan Respublikasynyň II sebitara forumynyň hem-de Özbegistanda öndürilen harytlaryň sergisiniň Medeniýet günleriniň dabaralary bilen utgaşmagy özboluşly sazlaşygy emele getirdi. 20-nji noýabrda Seýitnazar Seýdi adyndaky döwlet sazly drama teatrynda dostluk konserti ýaýbaňlandyrylyp, şäher ýaşaýjylarynyň, myhmanlaryň, foruma gatnaşyjylaryň uly gyzyklanmasyna eýe boldy. Bu konsert dostlukly döwletiň ýurdumyzdaky Medeniýet günleriniň hem özboluşly jemlenmesine öwrüldi.

Selbi TAŇRYBERDIÝEWA,
Türkmen döwlet medeniýet institutynyň Medeniýeti öwreniş hünäriniň 2-nji ýyl talyby.