Türkmen halkynyň medeni mirasy — özboluşly öwüşginlere beslenen bahasyna ýetip bolmajak milli hazynadyr. Bu medeni miras, halkymyzyň geçmişden şu güne çenli synmaz ruhy gymmatlyklaryny, milli sypatlaryny we ahlak ýörelgelerini özünde jemleýär. Hormatly Prezidentimiziň ýolbaşçylygynda, Berkarar döwletiň täze eýýamynyň Galkynyşy döwründe bu mirasyň halk arasynda ýaýbaňlandyrylmagyna uly üns berilýär.

Türkmenleriň gadymy däplerine we sungatyna ser salsak, olaryň durmuşa bolan nazaryýeti hem-de ajaýyp zehinleri giňden şöhlelenýär. Türkmen keşdeçilik sungaty bu mirasyň iň göze ilýän bölekleriniň biridir. Zenanlarymyzyň inçelik bilen ýerine ýetirýän keşdeleri türkmen durmuşynyň reňkli ýazgysy bolup hyzmat edýär. Köýnekleriň, kürteleriň we çabytlaryň nagyşlarynda ene-mamalarymyzyň döredijilik kuwwaty, milli ösen düşünjesi görünýär. Türkmenleriň meşhur “iňňe bilen guýy gazmak” ýaly pähimleri, bu ussatlyga ajaýyp düşündiriş bolup hyzmat edýär.

Halkymyzyň milli lybaslarynda we nakgaş eserlerinde tebigat bilen sazlaşygyň, ýerli ýaşaýyş keşbiniň çuňňur beýany duýulýar. Türkmen zenanynyň tikin işindäki çeperligi we duýgurlygy diňe bir görke däl-de, eýsem halkymyzyň içki dünýäsine, pikir-garaýyşlaryna hem güwä geçýär. Türkmen halky üçin bu sungat diňe bir zähmet ýa-da bezeg däl, eýsem kalbyň we ruhuň täsiri bilen döredilýän mukaddeslikdir.

Şeýle hem, türkmenleriň edebi mirasy — aýdym-saz sungaty, nakgaşçylyk, halk döredijiligi nesilleriň ruhyýetini kämilleşdirmekde möhüm orny eýeleýär. Halkymyzyň şöhratly taryhy, gahrymançylykly işleri gazallarda, dessanlarda, mukamlarda we halk döredijiliginde beýan edilýär.

 

Türkmenistan dünýäniň dürli ýurtlarynda geçirilýän sergilerde, festiwallarda öz medeni gymmatlyklaryny tanadýar. Bu çäreler türkmen ruhunyň baýlygyny we milli medeni mirasyň ähmiýetini açyp görkezmek bilen birlikde, halkymyzyň dünýä bileleşigine goşulmagyny hem pugtalandyrýar.

Milli mirasy gorap saklamak, ony ösdürmek we dünýä tanatmak bagtyýar halkymyzyň mukaddes borjudyr. Medeni mirasymyzyň geljekde-de dowamat-dowam bolmagy, ýaş nesillerimiziň bu gymmatlyklary buýsanç bilen dowam etdirmegi üçin döredilýän şertler, döwletimiziň bu ugurdaky syýasatynyň üstünliklidigine güwä geçýär.

Türkmenistanyň medeniýeti diňe bir geçmişe bolan hormatyň nyşany däl-de, eýsem halkyň belent ruhunyň we döredijilik mümkinçilikleriniň beýanydyr. Bu medeni miras bizi dünýäniň beýleki halklary bilen birleşdirýän ruhy köprüdir.

Selbi Serdarowa
S.A.Nyýazow adyndaky Türkmen oba hojalyk uniwersitetiniň 2-nji ýyl talyby,
Türkmenistanyň ýaşlar baýragynyň eýesi.