2025-nji ýylyň 10–12-nji oktýabry aralygynda Türkmenistanyň Söwda-senagat edarasynda “Saglygy goraýyş, bilim we sport — Berkarar döwletiň täze eýýamynyň Galkynyşy döwründe” atly halkara sergi we ylmy maslahat geçiriler.

Türkmenistanyň Söwda-senagat edarasynyň metbugat gullugynyň habar bermegine görä, bu çäre Türkmenistanyň Saglygy goraýyş we derman senagaty ministrligi bilen türk kompaniýasy “Net Fuar Organizasyon Ltd. Sti” tarapyndan bilelikde guralýar.

Sergä ýurdumyzyň ministrlikleriniň, pudaklaýyn dolandyryş edaralarynyň, daşary ýurt kompaniýalarynyň wekilleriniň, telekeçileriň hem-de Senagatçylar we telekeçiler birleşmesiniň agzalarynyň gatnaşmagyna garaşylýar.

Çäräniň dowamynda saglygy goraýyş ulgamyndaky enjamlar, gurallar, anyklaýyş tehnologiýalary, kliniki merkezleriň işläp taýýarlamalary bilen bir hatarda, bilim we sport ulgamlary boýunça iň täze tehnologik çözgütler tanyşdyrylar.

Aýna Nurmyradowa,

Türkmenistanyň Döwlet energetika institutynyň
mugallymy.