25-nji noýabrda geçirilen Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow iş maslahatynda täze kitabyny tamamlandygyny habar berdi. Ol bu eseriň türkmeniň beýik akyldary Magtymguly Pyragynyň adamzat medeniýetine goşan ägirt uly goşandyna bagyşlanandygyny nygtady.

“Hakyda göwheri” atly bu eser, taryhymyzyň şöhratly sahypalaryny, türkmen halkynyň medeniýetiniň dünýä siwilizasiýasyna goşan goşandyny beýan edýär. Kitapda Magtymguly Pyragynyň eserleriniň adamzadyň ruhy gymmatlyklaryna ýetiren täsirleri giňişleýin açylyp görkezilýär.

Milli Liderimiz taryhy we medeni gymmatlyklary öwrenmegiň wajypdygyny nygtap, geçmişiň mirasyny geljek nesle ýetirmegiň her birimiziň borjumyzdygyny belledi. Kitap tiz wagtda neşir edilip, halk köpçüligine ýetiriler. Maslahata gatnaşyjylar Milli Liderimizi täze döreden eseri bilen gutladylar we döredijilik ýoluna rowaçlyk arzuw etdiler.

Çeşme: TDH