Soňky ýyllarda dünýäde ýaşaýyş jaý meseleleriniň çözülişi bilen bagly täze pikirler we modeler ýüze çykýar. Şolaryň biri hem kiçi göwrümli jaýlaryň gurluşygy bolup, ýaşaýyş jaýlaryň bahalarynyň ýokarlanýan döwründe amatly we tygşytly alternatiwa hökmünde giňden kabul edilýär. Bu ideýa diňe bir maliýe taýdan tygşytly bolman, eýsem, ýaşaýyş meýdanynyň has netijeli ulanylmagyna ýardam berýär.

Dünýäniň köp ýurtlarynda, şol sanda ABŞ-da kiçi göwrümli ýaşaýyş jaýlary bilen bagly taslamalar giň meşhurlyk gazandy. Amerikaly ,,YouTube” bloggeri Lewi Kelliniň hödürlän jaý modeli bu ugurda özboluşly täzelikdir. Onuň guran jaýy bary-ýogy 1,8 inedördül metr meýdana eýe bolup, ähli amatlyklary öz içine alýar.

Lewi Kelliniň aýtmagyna görä, bu jaý dünýädäki iň kiçijik jaý bolmagy bilen tapawutlanýar we onuň Ginnesiň rekordlar kitabynda hasaba alynmagyna garaşylýar. Jaýyň içinde düşek, hajathana, aşhana, hatda amatly ýaşamak üçin zerur bolan ähli zatlar ýerleşdirilipdir. Bu jaýyň aýratynlygy mebel we enjamlaryň ýer tygşytlamaga mümkinçilik berýän ýagdaýda ýerleşdirilmegidir.

Lewi Kelliniň jaýynda giňeldilip we eplener ýaly görnüşde gurlan mebeller bar. Mysal üçin:

    •    Suw krany giňeldilip, duş üçin ulanylýar.

    •    Elektrik peçi tekjede saklanýar.

    •    Eplenýän düşek oturdylypdyr we aşhana stoly bilen bilelikde ulanylýar.

Jaýyň energiýa üpjünçiligi üçin gün panelleri ulanylýar. Mundan başga-da, daşarda duş we hajathana ýerleşdirilipdir. Kiçi göwrümli bolmagyna garamazdan, bu jaýda nasos, suw ýyladyş ulgamy we holodilnik hem bar. Şeýle tygşytly jaýy 5000 dollara ýygnamak mümkinçiligi onuň uly artykmaçlygydyr.

Türkmenistanda hem häzirki wagtda döwrebap ýaşaýyş toplumlarynyň we amatly jaýlaryň gurulmagy giň gerim alýar. Kiçi göwrümli jaýlaryň tejribesiniň ýurdumyza ornaşdyrylmagy ýaşaýyş jaý problemalarynyň çözgüdine täze ugur bolup biler. Munuň bilen birlikde, sanly tehnologiýalaryň we energiýanyň alternatiw çeşmeleriniň ulanmagy, şeýle jaýlary gurnamakda möhüm rol oýnap biler.

Tawus Ilmyradowa
Türkmen oba hojalyk institutynyň
2-nji ýyl talyby.