Bitaraplyk syýasy-jemgyýetçilik düşünje hökmünde dünýäde parahatçylygyň, ynanyşmagyň, we halkara hyzmatdaşlygyň berkidilmegine hyzmat edýän möhüm ýörelgedir. Türkmenistan, Bitarap döwlet hökmünde, bu ýörelgäni diňe bir resmi derejede ykrar etdirmek bilen çäklenmän, eýsem, onuň hereketde amal edilmegine-de işjeň gatnaşýar. 1995-nji ýylda Birleşen Milletler Guramasy tarapyndan ykrar edilen Türkmenistanyň hemişelik Bitaraplyk derejesi, döwletimiziň dünýä jemgyýetçiligindäki ornuny kesgitleýän taryhy waka boldy.

2024-nji ýylyň 21-nji martynda Birleşen Milletler Guramasynyň Baş Assambleýasynyň 78-nji sessiýasynyň 63-nji plenar mejlisinde «2025-nji ýyl — Halkara parahatçylyk we ynanyşmak ýyly» atly Kararnama biragyzdan kabul edildi. Bu başlangyç, Bitarap Türkmenistanyň parahatçylygy pugtalandyrmakda we ýurtlaryň arasyndaky dost-doganlyk gatnaşyklaryny ösdürmekde alyp barýan işleriniň dowamy hökmünde dünýä jemgyýetçiliginde ykrar edilýär. 2023-nji ýylyň 11-nji dekabrynda Aşgabat şäherinde geçirilen "Dialog - parahatçylygyň kepili" atly halkara maslahaty Türkmenistanyň dünýä ýurtlaryny parahatçylygy we hyzmatdaşlygy ösdürmäge çagyrmakdaky işjeň pozisiýasyny ýene-de bir gezek görkezdi. Maslahatda döwletler we halkara guramalar arasyndaky dialogy pugtalandyrmak, global meseleleriň çözgüdine bilelikde çemeleşmek ýaly möhüm meseleler ara alnyp maslahatlaşyldy.

Türkmenistan Bitaraplyk syýasaty bilen halkara gatnaşyklaryň täze filosofiýasyny döretdi. Bu syýasat halkara durnuklylygy üpjün etmegiň, sebitleýin parahatçylygy gorap saklamagyň, hem-de ykdysady, medeni we ynsanperwer hyzmatdaşlygy ösdürmegiň üstünlikli ýoluna öwrüldi. Şunuň ýaly inisiatiwalaryň biri hökmünde, Türkmenistan köptaraplaýyn forumlaryň we gepleşikleriň geçirilýän merkezine öwrüldi. Aşgabatda yzygiderli guralýan maslahatlar we halkara çäreler ýurduň dialog platformasy hökmünde möhüm ornuny görkezýär.

Häzirki döwürde, Türkmenistan diňe bir öz Bitaraplyk derejesine eýermek bilen çäklenmän, eýsem, Birleşen Milletler Guramasynyň we beýleki halkara guramalaryň goldawyna esaslanýan halkara kararnamalary hödürleýär. Bitaraplyk, ýurdumyzyň içerki we daşary syýasatynyň esasy sütüni bolup, dost-doganlyk, durnukly ösüş, we bagtyýarlyk ýörelgelerini ösdürmekde möhüm orun eýeleýär. Ýurdumyzyň alyp barýan bu syýasaty, diňe bir ýurduň abraýyny ýokarlandyrmak bilen çäklenmän, eýsem, sebitleýin we global durnukly ösüşiň möhüm sütüni hökmünde giňden ähmiýetlidir.

Merjen DURDYÝEWA,
Myrat Garryýew adyndaky Türkmenistanyň
Döwlet lukmançylyk uniweristetiniň Jemgyýeti
öwreniş kafedrasynyň mugallymy.