Türkmenistanda bilim ulgamynyň kämilleşdirilmegine, pedagoglaryň hünär derejesiniň ýokarlandyrylmagyna uly üns berilýär. Bu maksat bilen 2024-nji ýylyň 18-26-njy noýabrynda Türkmenistanyň Milli bilim instituty bilen Russiýa Federasiýasynyň Tatarystan Respublikasynyň Naberežnyýe Çelny Döwlet mugallymçylyk uniwersitetiniň arasyndaky hyzmatdaşlyk esasynda usuly-amaly okuwlar geçirildi.

Okuwlar esasan dil düzediş mugallymlara-defektologlara niýetlenip, Russiýaly alymlar tarapyndan taýýarlanan okuw-usuly gollanmalar bilen tanyşmak, mümkinçiligi çäkli çagalara bilim-terbiýe bermekde täze tilsimleri öwrenmek ýaly meseleleri öz içine aldy. Sapaklaryň iş ýüzünde görkezilmegi türkmen mugallymlary üçin aýratyn täsirli boldy.
Täze usullar bilen tanyşlyk.

Okuwlaryň dowamynda:
Mümkinçiligi çäkli çagalar bilen işlemek üçin täze metodiki çemeleşmeler görkezildi.
Russiýaly pedagogika alymlarynyň tejribe toplumy we bilim ulgamyndaky iň täze usulyýet gollanmalary diňleýjilere hödürlenildi.
Pedagoglar birek-birek bilen tejribe alyşyp, sorag-jogap görnüşinde işjeň gatnaşyga girdiler.
G.A. Hakimowa ýaly tejribeli alymlaryň ýolbaşçylygynda geçirilen okuwlar türkmen pedagoglarynyň hünär kämilleşdiriş mümkinçiliklerini has-da giňeltdi.

Şahadatnama gowşuryldy:
Okuwlary üstünlikli tamamlan türkmenistanly bilim işgärlerine Russiýanyň Naberežnyýe Çelny Döwlet mugallymçylyk uniwersitetiniň degişli şahadatnamalary dabaraly ýagdaýda gowşuryldy. Pedagoglar bu okuwlaryň öz iş tejribelerini baýlaşdyrýandygyny belläp, Gahryman Arkadagymyzyň we Arkadagly Serdarymyzyň bilim ulgamyna edýän üns-aladasyna çäksiz minnetdarlyk bildirdiler.

Çeşme:Türkmenistanyň Bilim Ministrligi

Sanjar AKMYRADOW,
Türkmenistanyň Döwlet energetika
institutynyň talyby.