12-nji oktýabrda, Ahal welaýatynyň Gökdepe etrabynyň Yzgant şäherçesiniň Mälikguly Berdimuhamedow adyndaky Medeniýet köşgünde, Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň, ÝUNESKO-nyň işleri barada Türkmenistanyň milli toparynyň hem-de Ahal welaýat häkimliginiň bilelikde guramagynda «Türkmen keşdeçilik sungaty — umumadamzat mirasy» atly halkara maslahat geçirildi.

Maslahata jemgyýetçilik guramalarynyň, köpçülikleýin habar beriş serişdeleriniň wekilleri, medeniýet we sungat işgärleri, keşdeçi-kürteçi zenanlar, mährem eneler gatnaşdylar. Şeýle-de bu foruma daşary ýurtlaryň birnäçesiniň wekilleri sanly ulgam arkaly goşuldylar. Bu ýere gelen myhmanlar ussatlyk bilen ýerine ýetirilen el işlerini, nepis haly önümlerini uly gyzyklanma bilen synladylar.