Ak bugdaý etrabynyň Gämi oba Medeniýet öýünde çagyryş boýunça harby gullugy geçen harby gullukçylaryň hem-de nobatdaky çagyrylyş möwsüminde harby gulluga gitjek ýaşlaryň gatnaşmagynda dabara geçirildi. «Çagyryş boýunça harby gullugy geçýän harby gullukçylary Türkmenistanyň Ýaragly Güýçlerinden, beýleki goşunlaryndan we harby edaralaryndan harby gullukdan boşatmak we Türkmenistanyň raýatlarynyň harby gulluga nobatdaky çagyrylyşy hakynda» degişli resminamalary ýerine ýetirmek maksadyndan ugur alnyp geçirilen bu dabarany welaýat häkimligi, welaýatyň harby wekilligi hem-de jemgyýetçilik guramalary bilelikde gurady.  

Dabarada Watan mukaddesligi, eziz Watanymyzy ýürekden söýmegiň we onuň öňündäki harby borjy ýerine ýetirmegiň mukaddesligi barada söz açyldy,  şonuň bilen baglanyşykly ýaşlara gymmatly öwüt-ündewler berildi, şeýle-de çagyryş boýunça harby gullugy geçip, ätiýaçlyga goýberilýän, şeýle-de nobatdaky çagyrylyş möwsüminde Watan borjuny ýerine ýetirmäge ugraýan ýaşlara ýagşy arzuwlar aýdyldy.

 Welaýatyň medeniýet we sungat ussatlarynyň, Watan goragçylaryndan düzülen aýdym-saz toparynyň ýerine ýetiren çykyşlary dabara baý öwüşgin goşdy. Sungat çykyşlary Watan mukaddesliginiň, watansöýüjiligiň we asuda durmuşymyzyň joşgunly beýany bolup, kalplary heýjana getirdi.