Türkmen döwlet medeniýet institutynyň geljekki uçurymlary «Ah söýgi, söýgi!» atly kinofilmi surata düşürýärler. Bu kinofilmiň režissýory institutyň mugallymy Çaryýar Seýidow bolup, film «Mekan» telekeçilik kinostudiýasynda surata düşürilýär we ol 27-nji iýunda, Medeniýet we sungat işgärleriniň, şeýle hem Magtymguly Pyragynyň şygryýeti güni görkeziler.

Ýeri gelende belläp geçsek, Türkmen döwlet medeniýet institutynyň «Teatr sungaty» fakulteti 1993-nji ýylda döredildi. Onda Türkmenistanyň halk we at gazanan artistleri, «Türkmeniň Altyn asyry» bäsleşiginiň ýeňijileri we tejribeli mugallymlar sapak berýärler.

Institut işläp gelýän döwründe telegepleşikleri alyp baryjylar, režissýorlar, tele we kinooperatorlar, ses režissýorlary we yşyk hünärmenleri ýaly ussat sungat işgärlerini taýýarlady.