Ak bugdaý etrabynyň Änew şäheriniň Türki medeniýetiň halkara guramasy (TÜRKSOÝ) tarapyndan 2024-nji ýylda «Türki dünýäniň medeni paýtagty» diýlip yglan edilmegi bilen baglylykda, bu guramanyň wekilleri gadymy şähere baryp gördüler. Saparyň esasy maksady Änew şäherinde 2024-nji ýylda geçiriljek çäreleriň meýilnamasyny taýýarlamakdan, bu taryhy künjek bilen ýakyndan tanyşmakdan ybarat boldy.

Myhmanlar gadymy Änewiň gözel ýerleri bilen tanyşdylar. Şäheriň görküne görk goşup, ajaýyp binagärlik keşbi bilen göreniň ünsüni çekýän Milli «Ak bugdaý» muzeýi myhmanlarda aýratyn täsir döretdi. Myhmanlar gadymy Änew metjidinde — Seýit Jemaleddin ýadygärlik toplumynda, Nowruz ýaýlasyndaky «Türkmeniň ak öýi» binasynda hem boldular.