12-nji oktýabrda Magtymguly adyndaky milli sazly drama teatrynda Türkmenistanyň we Mongoliýanyň artistleriniň bilelikdäki konserti geçirildi. Bu çäre Prezident Uhnaagiýn Hurelsuhyň ýurduňa eden döwlet saparynyň çäklerinde guraldy. Bu barada Türkmenistanyň resmi metbugaty habar berýär.

Medeniýetleri özara baýlaşdyrmaga we Türkmenistanyň dünýäniň medeni giňişligine goşulyşmagyna gönükdirilen halkara ynsanperwer hyzmatdaşlyk syýasaty hyzmatdaş döwletlere ýurdumyzda öz milli medeniýeti bilen tanyşdyrmaga mümkinçilik döretmegi hem göz öňünde tutýar. Bu maksatnamanyň üstünliklerini Türkmenistanda geçirilýän Medeniýet günleri, şol sanda Gazagystanyň Medeniýet günleri aýdyň görkezýär. Dostluk konserti bolsa, iki halkyň ruhy ýakynlaşmagyna we ikitaraplaýyn gatnaşyklaryň täze derejä çykmagyna ýardam etdi.

Türkmen-mongol hyzmatdaşlygyny ösdürmekde möhüm ädim bolan bu döredijilik çäresine dostlukly döwletiň medeniýet we sungat ussatlary gatnaşdylar. Çäräniň açylyş dabarasyna degişli edaralaryň, köpçülikleýin habar beriş serişdeleriniň ýolbaşçylary, döredijilik işgärleri, professor-mugallymlar we talyplar gatnaşdylar. Çykyş edenleriň aýtmagyna görä, Aşgabatda geçirilen bu konsert, ikitaraplaýyn gatnaşyklary işjeňleşdirmäge, döredijilik intelligensiýasynyň wekilleriniň hünär gatnaşyklaryny ösdürmäge we halklarymyzyň taryhyna, ruhy mirasyna bolan gyzyklanmalaryny artdyrmaga kömek eder. Dabara gatnaşyjylar, parahatçylyk söýüjilik we özara bähbitli hyzmatdaşlyk syýasatynyň alnyp barylmagy, döwletara medeni gatnaşyklaryň giňelmegi üçin hormatly Prezidentimize hoşallyk bildirdiler.

Kuwwatgeldi ALLAMYRADOW,
Türkmenistanyň Döwlet energetika institutynyň
talyby.