Türkmenistanyň futbol boýunça milli ýygyndy topary 11-nji martdan 12-sine geçilýän gije okuw-türgenleşik ýygnanyşygyny geçmek üçin Dubaý (BAE) şäherine tarap ýola düşer.

Magomed Adiýewiň ýolbaşçylygyndaky Gazagystanyň milli ýygyndy topary hem ýakyn günlerde Dubaýda okuw-türgenleşik ýygnanyşygyna başlaýar. Ýygyndynyň şeýle türgenleşikleri geçmek bilen, baş maksady «Ýewro – 2024-iň» saýlama tapgyrynyň pleý-off böleginde Gresiýanyň garşysyna geçiriljek duşuşyga taýýarlanmakdan ybaratdyr.

Toparyň şol jogapkärli oýna görýän taýýarlygynyň möhüm tapgyry Türkmenistanyň milli ýygyndysy bilen 14-nji martda geçirjek ýoldaşlyk duşuşygy bolar.

Mergen Orazowyň ýolbaşçylygyndaky tälimçiler düzümi ýygyndy toparyň öňde boljak okuw-türgenleşik ýygnanyşygyna hem-de Dünýä çempionaty – 2026-nyň çäginde 21-nji we 26-njy martda Eýranyň futbol ýygyndysynyň garşysyna geçiriljek saýlama duşuşygyna gatnaşjak düzümini ýakyn günlerde yglan eder.

Döwran ANNAMYRADOW,

Döwletmämmet Azady adyndaky
Türkmen milli dünýä dilleri
institutynyň talyby.