Şu ýylyň 15-16-njy maýynda Russiýanyň Tatarystan Respublikasynyň paýtagty Kazanda “Russiýa – Yslam dünýäsi: KazanForum 2025” atly forum hem-de “Russia Halal Expo 2025” sergisi geçiriler. Bu çäreler Yslam ýurtlary bilen ykdysady gatnaşyklary ösdürmäge, halal senagaty, maliýe hyzmatlary we sanly tehnologiýalar ulgamynda hyzmatdaşlygy güýçlendirmäge, şeýle-de maýa goýum mümkinçiliklerini giňeltmäge gönükdirilendir diýip, Türkmenistanyň Söwda-senagat edarasy habar berýär.

Türkmenistan bu foruma gatnaşyp, işewürlik gatnaşyklaryny pugtalandyrmagy, halal önümçiligini ösdürmegi we eksport mümkinçiliklerini giňeltmegi maksat edinýändigini mälim etdi.

Habarda bellenilişi ýaly, forumyň geçirilmegi ýurduň ykdysady taýdan durnukly ösmegine giň mümkinçilikleri döreder. Türkmenistanyň foruma gatnaşmagy daşary ýurt maýa goýumlarynyň artmagyna, täze söwda gatnaşyklarynyň emele gelmegine we milli bazaryň Yslam ykdysady giňişligine has-da laýyklaşmagyna ýardam eder.

“KazanForum 2025” Russiýa bilen Yslam Hyzmatdaşlyk Guramasyna agza ýurtlaryň arasynda ykdysady, medeni we tehnologik hyzmatdaşlygyň möhüm strategik meýdançasy hökmünde çykyş edýär.