2026-njy ýylyň 8-nji maýynda Kambojanyň paýtagty Pnompen şäherinde Türkmenistanyň we Kamboja Patyşalygynyň daşary syýasat edaralarynyň arasynda ilkinji syýasy geňeşmeler geçirildi.

Türkmenistanyň wekiliýetine Daşary işler ministriniň orunbasary Ahmet Gurbanow, Kamboja tarapyna bolsa Daşary işler we halkara hyzmatdaşlyk ministrliginiň Döwlet sekretary Ung Raçana ýolbaşçylyk etdi.

Geňeşmeleriň dowamynda taraplar ikitaraplaýyn hyzmatdaşlygyň häzirki ýagdaýyny we geljekki mümkinçiliklerini giňişleýin ara alyp maslahatlaşdylar. Şeýle duşuşyklaryň özara gatnaşyklary ösdürmekde we täze hyzmatdaşlyk ugurlaryny kesgitlemekde möhüm ähmiýete eýedigi bellenildi.

Taraplar ýokary derejeli duşuşyklaryň guralmagynyň, parlamentara gatnaşyklary ösdürmegiň we şertnama-hukuk binýadyny pugtalandyrmagyň ähmiýetine aýratyn üns berdiler.

BMG-niň çäklerinde alnyp barylýan netijeli hyzmatdaşlyk hem ýokary baha eýe boldy. Türkmenistanyň halkara başlangyçlaryny goldaýandygy üçin Kamboja tarapyna minnetdarlyk bildirildi.

Duşuşykda ASEAN bilen hyzmatdaşlyk meseleleri hem ara alnyp maslahatlaşyldy. Kamboja Türkmenistanyň «Merkezi Aziýa + ASEAN» formatyny döretmek baradaky başlangyjyny goldaýandygyny tassyklady.

Söwda-ykdysady gatnaşyklary ösdürmek maksady bilen işewür toparlaryň arasynda göni aragatnaşyklary ýola goýmak, biznes forumlaryny we söwda missiýalaryny geçirmek, dokma senagatynda, oba hojalygynda we ulag-logistika ulgamynda hyzmatdaşlygy giňeltmek boýunça möhüm ugurlar kesgitlenildi.

Nurjemal HANOWA,

Türkmenistanyň Daşary işler ministrliginiň

Halkara gatnaşyklary institutynyň talyby.