Ýakynda Türkmenistanyň Gruziýadaky Adatdan daşary we Doly ygtyýarly ilçisi D.Seýitmämmedow Gruziýanyň Halk goragçysy L.Ioseliani bilen duşuşyk geçirdi.

Duşuşygyň dowamynda taraplar türkmen-gruzin gatnaşyklarynyň dostluk, özara hormat goýmak we ynanyşmak ýörelgelerine esaslanýandygyny, şeýle hem onuň yzygiderli ösdürilip, işjeň häsiýete eýe bolýandygyny bellediler.

Gepleşikleriň barşynda adam hukuklaryny üpjün etmek bilen baglanyşykly möhüm meseleler ara alnyp maslahatlaşyldy. Şeýle-de milli adam hukuklary institutlaryny kämilleşdirmek, olaryň işiniň netijeliligini ýokarlandyrmak we bu ugurda toplanan oňyn tejribeleri özara alyşmak meselelerine aýratyn üns berildi. Taraplar degişli edaralaryň arasynda hyzmatdaşlygy giňeltmegiň hem-de tejribe alyşmagyň ähmiýetini nygtadylar.

Duşuşygyň ahyrynda taraplar özara hormat we ynam ýörelgelerine esaslanýan netijeli dialogy dowam etdirmäge, şeýle hem hyzmatdaşlygy mundan beýläk-de ösdürmäge taýýardyklaryny bellediler.