Ýakynda Tejen etrabynyň „Tejen“ daýhan birleşiginiň meýdan düşelgesinde günorta arakesmesi wagtynda, Tejen etrap häkimliginiň iş meýilnamasy esasynda etrap häkimliginiň, medeniýet bölüminiň hem-de jemgyýetçilik guramalarynyň bilelikde gurnamagynda, pagta ýygymyna gatnaşýan zähmetkeşleriň armasyny ýetirmek maksady bilen, aýdym-sazly medeni-dynç alyş çäresi gurnaldy.

Bu medeni dynç alyş çäresine etrabyň il sylagly ýaşululary, pagta ýygymyna gatnaşýan ýygymçylar, mehanizatorlar, sürüjiler we öňdebaryjy kärendeçiler gatnaşdylar.

Baýramçylyk çäresinde etrap medeniýet bölüminiň aýdymçylarynyň, folklor hem-de tans toparlarynyň çykyşlary, sahna wäşileriniň gülkili sahna oýunlary ýygnananlaryň gyzgyn el çarpyşmalaryna mynasyp boldy.

Dabaraly çärede etrap medeniýet bölüminiň merkezi kitaphanasy tarapyndan Gahryman Arkadagymyzyň atalyk kitaplarynyň sergisi çärä gatnaşyjylarda uly täsir galdyrdy.

Dabaranyň ahyrynda pagta ýygymy möwsümine işjeň gatnaşýan ýygymçylar Aşyrowa Aýgül, Meredowa Käkilik, Ataýewa Gülälek, mehanizatorlar Baýramow Maksat, Sapargeldiýew Merdan, sürüjiler Jepbarow Döwletgeldi hem-de öňdebaryjy kärendeçiler Berdimyradowa Bägül, Geldiýew Durdy dagylara etrabyň jemgyýetçilik guramalary tarapyndan ýadygärlik sowgatlary gowşuryldy.

Aýsoltan Öwezowa
Türkmenistanyň Kärdeşler arkalaşyklarynyň Ahal welaýatynyň Tejen etrap birleşmesiniň hünärmeni