Belgiýanyň Brýussel şäherinde “Türkmenistan – Ýewropa Bileleşigi” bilelikdäki komitetiniň 23-nji mejlisi geçirildi. Bu barada Türkmenistanyň Daşary işler ministrligi habar berdi.

Mejlise Türkmenistanyň wekiliýetine maliýe we ykdysadyýet ministri Serdar Joraýew başlyklyk etdi. Wekiliýetiň düzüminde, şeýle hem Daşky gurşawy goramak, Bilim, Daşary işler, Maliýe we ykdysadyýet ministrlikleriniň wekilleri hem-de Ministrler Kabinetiniň ýanyndaky Ulag we kommunikasiýalar agentliginiň wekilleri yer aldy. Ýewropa Bileleşiginiň wekiliýetine Ýewropanyň daşary aragatnaşyklar gullugynyň Ýewropa we Merkezi Aziýa meseleleri boýunça dolandyryjy direktorynyň orunbasary Luk Dewin başlyklyk etdi. ÝB-niň wekiliýeti söwda, halkara hyzmatdaşlygy, ulag, energetika, bilim we medeniýet, ylmy barlaglar we innowasiýalar ýaly dürli düzümleriň wekillerinden ybarat boldy.

Duşuşykda söwda hyzmatdaşlygynyň, şol sanda Türkmenistanyň Bütindünýä Söwda Guramasyna (BSG) goşulmagyny goldamagyň, ýurtlardaky makroykdysady ýagdaýlaryň hem-de ulag arabaglanyşygyny we sanlylaşdyrmagyň meseleleri ara alnyp maslahatlaşyldy. Energetika, daşky gurşawy goramak we durnukly ösüş, suw serişdelerini dolandyrmak, metan zyňyndylaryny azaltmak we gaýtadan dikeldilýän energiýa çeşmelerini ulanmak meseleleri esasy üns merkezi boldy.

Türkmen tarapy bu ulgamlarda öz başlangyçlaryny tanyşdyrdy, ÝB bolsa “BOMCA” we “CADAP” ýaly birnäçe maksatnamalaryň we taslamalaryň çäklerinde hyzmatdaşlyk üçin mümkinçiliklerini hödürledi. Ynsanperwer ugurly gün tertibi çäklerinde bilim we medeni alyşmalaryň meseleleri hem maslahatlaşyldy. Mejlis Türkmenistan bilen ÝB arasynda ikitaraplaýyn gatnaşyklary mundan beýläk-de berkitmegiň mümkinçilikleriniň ara alnyp maslahatlaşylmagy bilen tamamlandy. Taraplar hyzmatdaşlygy çuňlaşdyrmak üçin gepleşikleri yzygiderli geçirmegiň möhümdigini nygtadylar.

Ogultäç BAÝRAMGULYÝEWA,
Berdimuhamet Annaýew adyndaky Arkadag şäher
mugallymçylyk orta hünär okuw mekdebiniň talyby.