Türkmenistan Garaşsyzlyk gününden bäri geçen 33 ýylyň dowamynda netijeli, oňyn we parahatçylyk söýüjilik ýörelgelerine esaslanýan daşary syýasat strategiýasyny üstünlikli amala aşyrdy. Bu strategiýa hoşniýetli goňşuçylyk, deňhukuklylyk, özara hormat goýmak we halkara dialogynyň ösdürilmegi bilen dürli taraplar bilen işbirligini giňeltmäge gönükdirilendir. Türkmenistanyň Milli Lideri Gurbanguly Berdimuhamedowyň ýolbaşçylygynda başlanan, häzirki wagtda bolsa hormatly Prezidentimiz Serdar Berdimuhamedowyň baştutanlygynda üstünlikli durmuşa geçirilen bu syýasat, ýurduň häzirki zaman meselelerini çözmäge işjeň we maksada okgunly gatnaşmagy üpjün edýär.

Garaşsyzlyk ýyllarynda Türkmenistanyň syýasy we diplomatik ulgamlarynda möhüm üstünlikler gazanyldy, ykdysadyýetde döwrebaplaşdyrma işlerine uly üns berildi, halkyň abadançylyk derejesi ýokarlandy we giň gerimli özgertmeler amala aşyryldy. "Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda" kesgitlenen wezipelere laýyklykda, ykdysadyýetimizi diwersifikasiýalaşdyrmak, pudaklary ösdürmek we milli maksatnamalary ýerine ýetirmek boýunça uly işler alnyp barylýar.

Türkmenistan, içki ykdysady we syýasy durnuklylygyň üpjün edilmegi, işewürlik we maýa goýum ulgamynyň güýçlendirilmegi arkaly halkara gatnaşyklarynda netijeli we oňyn hyzmatdaşlyk edýän döwlete öwrüldi. Bu, ýurdumyzyň ykdysady kuwwatynyň artmagy, tebigy serişdeler we logistik kuwwat bilen birleşip, halkara hyzmatdaşlyklarynda üstünlik gazanmagyň esasyny emele getirýär. Türkmenistan, ählumumy ösüşiň meselelerine oýlanyşykly çemeleşmeler we deňeçerlik esaslanýan ýörelgeleri bilen halkara parahatçylygy, howpsuzlygy we durnukly ösüşi durmuşa geçirmekde mynasyp orun eýeleýär.

Türkmenistanyň daşary syýasaty ähli ýurtlaryň we halklaryň abadançylygyny gazanmak, özara ynanyşmak we düşünişmek prinsiplerine esaslanýar. Bu çemeleşmeler ýurduň halkara gatnaşyklarynda giňden tanalýan we örän möhüm orun alýan strategik ulag we ykdysady merkez bolup, global parahatçylygy we durnukly ösüşi pugtalandyrmaga ýardam berýär.

Maral JUMAMYRADOWA,
Seýitnazar Seýdi adyndaky türkmen döwlet
mugallymçylyk institutynyň pedagogika fakultetiniň
II ýyl talyby.