Täze eýýamyň üstünlikler bilen rowaçlanýan ýurdunda Milli Liderimiz Gahryman Arkadagymyzyň başyny başlan beýik başlangyçlaryny mynasyp derejede dowam etdirýän Arkadagly Serdarymyzyň baştutanlygynda bu gün alnyp barylýan durmuş ugurly döwlet syýasatynyň baş ugurlarynyň biri-de durmuş goraglylygyny üpjün etmekdir. Munuň özi bagtyýar halkymyzyň abadan durmuşynyň bähbidine gönükdirilip amala aşyrylýan asylly başlangyçlarda, beýik işlerde, döwletli tutumlarda we ynsanperwer ýörelgelerde aýdyň ýüze çykýar. Ýurdumyzyň durmuş-ykdysady ulgamynyň kämilleşdirilmegi esasy wezipeleriň biri hökmünde kesgitlenilip, bilim we ylym ulgamyny ösdürmek, saglygy goraýşyň we beýleki ulgamlaryň maddy-enjamlaýyn binýadyny döwrebaplaşdyrmak boýunça maksatnamalar ýerine ýetirilýär. Ilatyň durmuş taýdan goraglylygy, dürli iş orunlary, ýokary amatlykly ýaşaýyş jaýlary bilen üpjünçiligi babatda durmuşa geçirilýän möhüm wezipeler göwün guşumyzy ganatlandyrýar.
Häzirki sanly ulgamyň barha çalt depginler bilen ösýän zamanasynda ähli ugurlara sanly tehnologiýalaryň ornaşdyrylmagy netijesinde sanlylaşdyrylan durmuş ulgamlarynyň toplumlaýyn gurulmagyna aýratyn ähmiýet berilýär. Dürli ugurly döwlet edaralarynda ilata internet tory arkaly maglumatlary ýetirmegi ýola goýmak, iş üpjünçiliginde maglumat-aragatnaşyk hyzmatlaryny peýdalanmagyň derejesini ýokarlandyrmak sanly hyzmatlaryň gerimini giňeltmek göz öňünde tutulýar. Ilata edilýän durmuş hyzmatlaryny sanlylaşdyrmak esasynda durmuş goraglylygy ulgamynyň ösüşini üpjün etmek şu günki günüň ileri tutulýan möhüm wezipesi bolup durýar. Munuň özi diňe bir durmuş goraglylygy ulgamynyň ösüşini üpjün etmek bilen çäklenmän, eýsem, goşmaça iş orunlarynyň döredilmegine hem ýardam berýär. Ilaty durmuş taýdan goramak ulgamynyň sanlylaşdyrylmagy maglumat goraglylygyny hem talap edýär. Ilata hödürlenýän durmuş hyzmatlaryny elektron görnüşe geçirmek köptaraplaýyn peýdaly bolup, ol wagty tygşytlamaga, islendik pursatda elýeterliligi üpjün etmäge, täzelikler bilen onlaýn ýagdaýda tanyşmaga mümkinçilik berýär. Durmuş goraglylygy ulgamyna sanly döwrebap tehnologiýalaryň girizilmegi işiň netijeliligini ýokarlandyrmaga hem mümkinçilik berýär. Ilaty durmuş taýdan goramak ulgamynyň netijeli işlemegine gönükdirilen maglumat-kommunikasiýa tehnologiýalaryny giňden peýdalanmagyň hasabyna dürli düzümleriň özara gatnaşyklary ýokarlanýar we gözegçiligi amala aşyrmaga täze mümkinçilikler döreýär. Netijede milli ykdysadyýetiň pudaklarynyň ösüşini tizleşdirmek we ilata edilýän hyzmatlary ýeňilleşdirmek maksady bilen ilaty durmuş taýdan goramak hyzmatlaryny sanly ulgam arkaly ýerine ýetirmek, döwrüň talabyna laýyklykda hyzmatlaryň görnüşlerini kämilleşdirmek Döwlet Baştutanymyzyň ýola goýýan asylly işleriniň ajaýyp nusgasydyr. Şeýle ajaýyp zamanada bagtyýar raýatlarymyz we biz ýaşlar hakyndaky aladany döwlet syýasatynyň ileri tutulýan ugry hökmünde kesgitleýän Milli Liderimiz Mähriban Arkadagymyzyň hem-de hormatly Prezidentimiz Arkadagly Serdarymyzyň janlary sag, ömürleri uzak bolsun, halkymyzyň abadançylygynyň bähbidine alyp barýan işleri barha rowaç alsyn!
Jennet MUHAMMEDOWA,
Türkmenistanyň Inžener-tehniki we
ulag kommunikasiýalary
institutynyň talyby.