2022-nji ýyly uly üstünlikler bilen jemlän Mary welaýatynyň maldarlary jemgyýetçilik mallaryny gyşdan başbitin, orta we ýokary semizlikde alyp çykmak üçin yhlasly zähmet çekýärler. Göreldeli çopanlaryň hatarynda Sakarçäge etrabyndaky «Sakarçäge» düýedarçylyk hojalygynyň sarwanlarynyň atlarynyň hem ýygy-ýygydan agzalýandygy ýörite bellärliklidir.

Kärendeçi çopan toparlarynyň 21-sini özünde jemleýän bu hojalyk her ýylda bolşy ýaly, şu ýyl hem düýelerden köp önüm almak, olary göwnejaý gyşlatmak ýaly derwaýys meselelere aýratyn uly üns berip, medeni zonadan has uzaklardaky öri meýdanlarynda edermenlikli zähmetiň ajaýyp nusgasyny görkezýärler. 1 müň 230 tonna iri baldakly ot, 230 tonna ýorunja bedesini, 166 tonna arpa taýýarlap, bol ot-iým goruny döreden, düýeleri orta we ýokary semizlikde bakyp, gyşdan başbitin alyp çykmagy maksat edinen maldarlaryň saýlap alan Şyhmansur, Hanguýy, Galandar ýaly öri meýdanlary bolsa, sazak, çerkez, ýandak ýaly ösümlikleriň, ot-çöpleriň bol biten ýeri hasaplanylýar. Şeýle bolansoň, aňzakly gyş pasly üçin gerek boljak ot-iým gorunyň berk binýadynyň tomus-güýz aýlarynda pugta tutulmagy, üstesine-de, gyşda düýeleriň ot-çöplere bol öri meýdanlarynda yhlas bilen bakylmagy mallara möwsümde garaşyk etmäge mümkinçilik döredýär.

Maldarçylyk hojalygynda şu günki gün 2904 baş düýe bar. Ýöne bu sanyň ýakyn günlerde artyp başlajakdygyny hem guwanç bilen aýdasymyz gelýär. Çünki köşek almak möwsümi hem indi ol diýen uzakda däl. Sarwanlar bu jogapkärli möwsümi hem hemmetaraplaýyn taýýarlykly garşylamak üçin zerur bolan çäreleri görüpdirler. Hojalyk nobatdaky möwsümde 700-e golaý sagdyn köşek almagy meýilleşdirýär. Munuň üçin çopan toparlary jogapkärli möwsümde özara bäsleşik esasynda zähmet çekýärler.