Berkarar döwletimiziň bagtyýarlyk döwründe “Türkmenistan-Bitaraplygyň Mekany” ýylynda sagdyn durmuş ýörelgeleri biziň jemgyýetimizde barha rowaçlanýar. Ýurdumyzda sagdyn durmuş ýörelgesine eýerýän jemgyýeti kemala getirmek, raýatlarymyzyň berk bedenli we sagdyn ruhly, ýokary aň-düşünjeli kämil bolmaklaryny gazanmak şeýle-de ýaşlaryň arassa ahlakly bolmaklary, ýüze çykýan nogsanlyklardan, bidüzgünçiliklerden, jenaýatçylykly hereketlerden daşda durmaklaryny gazanmak maksady bilen TMÝG-niň Babadaýhan etrap Geňeşiniň, etrap bilim bölüminiň hem-de etrap polisiýa bölüminiň wekilleriniň gatnaşmaklarynda ýörite tassyklanylan meýilnamalaryň esasynda etrabyň bilim ulgamynyň edaralarynda “Arassa, ruhy tämiz halk beýikdir” atly şygarlar bilen terbiýeçilik ähmiýetli  wagyz-nesihat duşuşyklary yzygiderli geçirilýär.

Etrabyň 18-nji orta mekdebinde guralan wagyz-nesihat duşuşygy hem şeýle çäreleriň biri boldy. Oňa mekdebiň bilim işgärleri we ýokary synplaryň okuwçylary işjeň gatnaşdylar. Wagyz-nesihat duşuşygynda çykyş edenler hormatly Prezidentimiziň sagdynlyk ýörelgelerini biziň durmuşymyza ornaşdyrmakda amala aşyrýan özgertmeleri, we ýetilen ösüşlerimiz, gelejegimiziň eýeleri boljak ýaşlaryň ruhy-ahlak, beden taýdan sagdyn, ruhybelent, döwrebap bilimli we hünärli adamlar edip ýetişdirmekde edýän taýsyz tagalalary hakynda buýsanç bilen durup geçdiler. Netijeli geçen wagyz-nesihat duşuşygy özüniň terbiýeçilik ähmiýeti bilen ýaşlarda uly täsir galdyrdy. Wagyz-nesihat duşuşygynda işjeň pikiralyşmalara, sowal-jogap alyşmalara giň orun berildi.