2026-njy ýylyň 17-nji fewralynda Türkmenistanyň Rumyniýadaky Ilçihanasynyň binasynda 2026-njy ýylyň “Garaşsyz, baky Bitarap Türkmenistan – bedew batly at-myradyň mekany” diýen şygaryna hem-de Türkmenistanyň diplomatik işgärleriniň gününe bagyşlanan çäre geçirildi. Bu dabara Rumyniýada ýaşaýan türkmen talyplary hem-de watandaşlarymyz gatnaşdylar. Bu barada Türkmenistanyň DIM-niň resmi web-saýtynda habar berildi.

Çäräniň dowamynda 2026-njy ýylyň degişli şygar bilen atlandyrylmagynyň ýurdumyzyň taryhy ösüş ýolunyň dowamlylygyny, milli mirasa sarpa goýulýandygyny hem-de parahatçylykly, durnukly ösüş ýörelgesine ygrarlydygyny aýdyň görkezýändigi bellenildi. Şeýle-de döwletliligiň nyşany hökmünde türkmen bedewiniň aýratyn ähmiýeti, milli däp-dessurlaryň we ruhy gymmatlyklaryň dowamlylygy nygtaldy.

Çykyş edenler Türkmenistanyň daşary syýasatynyň hemişelik bitaraplyk derejesine, netijeli halkara hyzmatdaşlygyna hem-de sebit we ählumumy derejede ynanyşmaga esaslanýandygyny bellediler. Şeýle çemeleşmäniň çäklerinde parahatçylygy, durnuklylygy we ösüşi üpjün etmek ugrunda öňe sürülýän başlangyçlaryň ähmiýeti aýratyn nygtaldy.

Bu çäre gatnaşyjylara 2026-njy ýylyň şygary hem-de diplomatik işgärleriň hünär baýramy bilen baglylykda ýurdumyzyň daşary syýasatynyň ileri tutulýan ugurlary barada giňişleýin maglumat almaga mümkinçilik döretdi.

Maýa Gurdowa,

Türkmenistanyň Daşary işler ministrliginiň

Halkara gatnaşyklary institutynyň talyby.