Özbegistanyň futbol boýunça milli ýygyndysy taryhynda ilkinji gezek futbol boýunça dünýä çempionatyna gatnaşmak hukugyny gazandy. Aziýanyň Futbol Konfederasiýasynyň agzasy hökmünde çykyş edýän Özbegistan, 2026-njy ýylda geçiriljek dünýä çempionatynyň saýlama tapgyrynda üstünlikli netije gazandy.

“A” toparçada çykyş eden özbek ýygyndysy Eýranyň ýygyndysyndan soňra ikinji orny eýeläp, çempionata göni gatnaşmaga hukuk aldy. Toparçanyň 9-njy tapgyrynda Özbegistan Birleşen Arap Emirlikleriniň meýdançasynda duşuşyp, 0:0 hasabynda deňme-deň oýnady. Bu netijeden soň Özbegistanyň utuk sany 18-e ýetdi, üçünji orundaky BAE bolsa 14 utuk toplady.

Toparçanyň jemleýji duşuşygy 10-njy iýunda bolar. Şol gün Özbegistan öz meýdançasynda Kataryň ýygyndysyny kabul eder. Häzirki wagtda toparçada liderlik 20 utuk bilen Eýranyň milli ýygyndysyna degişli.

Özbegistanyň futbol ýygyndysy ilkinji halkara duşuşygyny 1992-nji ýylda geçirdi, 1994-nji ýylda bolsa Aziýanyň Futbol Konfederasiýasyna hem-de FIFA-a agza boldy. Şeýlelikde, Merkezi Aziýa ýurtlarynyň arasynda dünýä çempionatyna gatnaşmaga ilkinji mümkinçilik gazanan ýurt hökmünde Özbegistan taryha girdi.

2026-njy ýylda dünýä çempionaty 11-nji iýun – 19-njy iýul aralygynda ABŞ-da, Kanadada we Meksikada geçiriler. Eýran bilen birlikde Ýaponiýa, Täze Zelandiýa we Argentina hem çempionata gatnaşmak hukugyny eýe bolan ýygyndylaryň hatarynda durýar.