Garaşsyz ýurdumyzda oba hojalyk pudagy ykdysadyýetimiziň möhüm pudagy bolup, häzirki wagtda, oba hojalyk toplumynyň önümleriniň eksportyny artdyrmak, importynyň möçberini azaltmak babatda Arkadagly Serdarymyzyň başda durmagynda netijeli işler ýola goýulýar. Berkarar döwletiň täze eýýamynyň Galkynyşy döwründe agrosenagat toplumynyň ösüşinde oba hojalyk önümleriniň ýokary hilli görnüşlerini öndürmeklige aýratyn üns berilýär. Oba hojalyk önümlerini gaýtadan işleýän önümçilikler, guşçulyk toplumlary, döwrebap ýyladyşhanalar, azyk önümlerini uzak möhletleýin saklaýan  ululy-kiçili ammarlar gurlup ulanylmaga berilýär. Oba hojalyk toplumynda hem gazanylýan belent sepgitler Arkadagly Serdarymyzyň beýik özgertmeleriniň oňyn netijesi bolup durýar. Eziz Diýarymyzda agrosenagat toplumyny ösdürmek meselelerine döwlet derejesinde uly ünsüň berilmegi netijesinde edermen daýhanlaryň, oba zähmetkeşleriniň yhlasly, irginsiz zähmet çekmekleri mynasyp goldaw tapýar. Toplumy düýpli özgertmeklige gönükdirilen döwlet maksatnamalarynyň kabul edilmegi häzirki wagtda Watanymyzda oba hojalyk pudagynda önüm öndürmeklige isleg bildirýän raýatlaryň sanynyň yzygiderli artmagyny şertlendirýär. Çuňňur oýlanyşykly ýöredilýän oba hojalyk syýasaty Arkadagly Serdarymyzyň bu bu iri ulgamy özgertmek ugrunda alyp barýan işleriniň esasy bölegi bolmak bilen, ýurdumyzyň oba hojalygynyň çalt depginlerde ösdürmegiň we ony döwrüň talabyna laýyk gelýän täze sepgitlere çykarmagyň möhüm şertleriniň biri bolup çykyş edýär. Häzirki wagtda ekerançylaryň döredijilikli zähmet çekmegi üçin amatly şertleri döretmäge gönükdirilen düýpli özgertmeler durmuşa geçirilýär. Bu ulgamda agrotehniki kadalaryň berk berjaý edilmegi bilen pagtanyň, bugdaýyň, gök-bakja önümleriniň bol hasyly alnyp, olar ylmy esasda ösdürilip ýetişdirilýär. Durmuşa geçirilýän giň möçberli özgertmeleriniň çäklerinde, suw hojalygynyň maddy-enjamlaýyn binýadynyň berkidilmegine möhüm ugur degişlidir. Bu möhüm pudagyň tehniki taýdan enjamlaşdyrylmagyna ägirt uly maliýe serişdeleri gönükdirilýär. Bu zatlaryň ählisi bolsa, Arkadagly Serdarymyzyň alyp barýan oba hojalyk özgertmeleriniň dowamat dowam bolýandygyny alamatlandyrýar.  

Röwşen GYLYÇMYRADOW,

Türkmen oba hojalyk institutynyň 3-nji ýyl talyby.