Täze taryhy döwrümiziň ösüşlere beslenýän günlerinde ýurdumyzyň beýleki sebitleri ýaly, gadymy Ahal topragynda hem iri taslamalar üstünlikli amala aşyrylýar. Gökdepe etrabynyň çäginde gurulýan täze nusgalyk şäher Ahal welaýatyň dolandyryş merkezi welaýatyň taryhynda iň iri taslamalaryň biridir.

      Mälim bolşy ýaly, Ahal welaýatynyň täze, döwrebap dolandyryş merkeziniň gurluşyk işleri 2019-njy ýylda başlanylyp, ony gurmak boýunça hödürlenen taslamalar we täze şäherde gurulmagy göz öňünde tutulýan desgalaryň binagärlik-gurluşyk aýratynlyklary bilen tapawutlanýar. Bu gurulýan döwrebap şäheriň, ozaly bilen, bu ýerde ýaşaýan adamlar üçin niýetlenilýändigi, şonuň üçin welaýatyň täze dolandyryş merkeziniň taslamasynyň maksadalaýyklygy, olar bilen ähli derejelerde ylalaşylandygy bellenilýär. Şeýle-de, agzalan taslamalar raýatlaryň arzuw-islegleriniň, pikirleriniň nazara alynmagy esasynda gurnalyp, nusgalyk şäheriň taslamasyny amala aşyrmagyň ýollarynda möhüm we buýsançly wakalara gabat gelmek bolýar.

Welaýatyň dolandyryş merkezini gurmagyň taslamasynyň birinji tapgyrynda göz öňüne tutulan desgalary gurmakda Türkmenistanyň Senagatçylar we telekeçiler birleşmesiniň agzalary bolup durýan hususy kärhanalaryň we hojalyk jemgyýetleriniň işjeňlik görkezýändigi has-da guwandyrýar. Giň gurluşyk meýdançasynda “Aktab” hususy kärhanasy tarapyndan iki gatly kottejleriň gurluşygy güýçli depginde alnyp barylýar. Bu ýerde şeýle görnüşli binalaryň onlarçasyny gurmak göz öňüne tutulýar. Täze şäherde bina edilmeli döwrebap ýaşaýyş jaýlarynyň gurluşygy hem hususy pudagyň wekillerine ynanylypdyr. “Kämil ymarat”, “Altyn Tug”, “Älem ýyldyzlary”, “Ussat inžener” hususy kärhanalary, “Sähet gurluşyk” hojalyk jemgyýeti özlerine ynanylan 9 gatly 54 öýli ýaşaýyş jaýlarynyň gurluşyk işleriniň hiline aýratyn ähmiýet berjekdigine şühbe ýokdur. Ady agzalan hususy kärhanalardyr hojalyk jemgyýeti geçen ýyllarda ähli amatlyklary bolan ýaşaýyş jaýlaryny, beýleki desgalary gurmakda baý tejribe topladylar. Olar paýtagtymyzy gurmagyň çäklerinde tapgyrlaýyn alnyp barylýan gurluşyk-binagärlik işlerinde özlerini görkezip, bu ugurda uly meşhurlyga eýe boldular.

Ahal welaýatynyň dolandyryş merkeziniň nobatdaky tapgyryny 2021-nji ýylyň sentýabr aýynda ulanmaga doly taýýar edip tabşyrmak göz öňünde tutulýar. Gurluşyk meýdançasynda ýaýbaňlandyrylan işler nusgalyk täze şäherde gurulmaly desgalaryň we inženerçilik ulgamlarynyň gurluşyklarynyň öz wagtynda tamamlanjakdygyna ynamy artdyrýar. Gadymyýetde medeniýetiň gülläp ösen mekany, söwda ýollarynyň çatrygy hökmünde uly meşhurlyk gazanan bu taryhy künjek özüniň howasynyň hoştaplygy, tebigy gözellikleri bilen tapawutlanýar. Täze şäheriň gurluşyk işlerine gatnaşýan gurluşykçy hünärmenleriň erjellik hem-de tutanýerlilik bilen işlemekleri bu ýerdäki iş depgininiň barha artmagyna täsirini ýetirýär. Olar taryha altyn harplar bilen ýazyljak beýik tutumly işlere saldamly goşant goşýandyklary üçin özlerini juda bagtly saýýarlar.

Gurluşyk işlerinde özümizde öndürilen ýokary hilli gurluşyk materiallarynyň ulanylmagy diýseň begendirýär. Aýratyn bellemeli zatlaryň biri-de, täze şäheriň gurluşygynda peýdalanylýan gurluşyk önümleriniň esasy böleginiň welaýatymyzyň çägindäki önümçilik kärhanalaryna degişli bolmagydyr. Bilşimiz ýaly, häzirki wagtda welaýatymyzda Kelete, Bäherden sement zawodlary, “Türkmendemirönümleri” kärhanasy, Gazbeton öndürýän kärhana, mermer we granit işlenilýän kärhana hereket edýär. Olar tarapyndan öndürilýän ýokary hilli önümler ýurdumyzda giň gerim alan gurluşyklarda giňden ulanylýar. Ykdysadyýetiň döwlete dahyly bolmadyk pudagynyň wekilleri hem dünýä bazarynda bäsdeşlige ukyply gurluşyk önümlerini öndürmek babatynda üstünlikli işleri alyp barýandygy bellenmäge mynasypdyr. Ýerli çig malyň hasabynda, köp görnüşli, ýokary hilli gurluşyk önümlerini öndürýän kärhanalaryň biri-de “Ukyply kärdeşler” hususy kärhanasynyň Bäherden etrabynyň çägindäki gazbeton we gury gurluşyk garyndylaryny öndürýän zawodlar toplumydyr.

Täze şäheriň gurluşyk meýdançasynda bolanyňda, ady agzalan kärhananyň ýokary hilli gurluşyk önümleriniň giňden ulanylýandygyna göz ýetirýärsiň. Şonda ýurdumyzda innowasion häsiýetli önümçilikleri döretmek, ýurdumyzda bäsdeşlige ukyply, ekologiýa taýdan arassa taýýar önümleri öndürmek hem-de olary dünýä bazaryna çykarmak ugrunda edilýän işler öran buýsandyryjydyr.