Berkarar döwletiň täze eýýamynyň Galkynyşy döwrüniň ganatly günlerinde Arkadagly Serdarymyzyň saýasynda merdana halkymyzyň milli gymmatlyklaryna, medeni mirasyna uly sarpa goýulýar. Türkmen halkymyzyň tutuş dünýä nusgalyk, ebedi gymmatlyklarynyň hem gadymy nusgalarynyň biri-de nepis türkmen halysy bolup durýar. Bu nepis sungat milli medeniýetimiziň aýrylmaz bir bölegidir, halkymyzyň ebedi baýlygydyr. Gadymyýetiň şaýady, döwürleriň gymmatlygy bolan türkmen halyçylyk sungatynyň ÝUNESKO-nyň abraýly sanawyna girizilmegi bu gadymy sungatyň dünýä derejesinde arzylanýandygyndan habar berýär. Çünki türkmen halysy – sungatyň hut özi, milletimiziň ruhy aňynyň, pähim-paýhasyň ebedi dabaralanmasydyr. Milli Liderimiz Mähriban Arkadagymyzyň «Janly rowaýat», «Arşyň nepisligi» ýaly gymmatly kitaplarynda hem halynyň beýikligi, nepisligi, gymmaty dogrusynda giňişleýin maglumatlar berilýär. Gadymy döwürde täze haly köçä ýa-da bazar meýdançasyna ýazylyp, onuň üstünden adamlar ýöräp geçipdirler, näçe adam kän geçse, şonça-da gowy hasaplanypdyr. Şeýdip, halynyň berkligini barlap görüpdirler. Bu hem özboluşly däp bolupdyr. Işe girişilende, halyça: «Goý, daragyň bady ýatmasyn!», «Gözüň aýdyň» diýipdirler. Çeper elli halyçylar haly kesenlerinde şeýle sözler bilen gutlamak däp bolupdyr. Özem bu däp örän dabaraly geçirilipdir, oňa dost-ýarlar, goňşy-golamlar çagyrylypdyr. Ata-babalarymyz «Öý haly ýazylan ýerden başlanýar» diýipdirler. Çaga özi üçin ýörite dokalan halyda öz ilkinji ädimlerini ädýär, gyzlar durmuşa çykanlarynda bagtly durmuşa ýoluna sary ilkinji ädimini şunda ädýärler. Ine şeýdip, haly türkmeniň doglandan tä soňky gününe çenli ömürboýy aýrylmaz hemrasy bolýar.

Asyrlaryň dowamynda türkmen halysyna «Syrlardan dokalan gözellik» diýip at beripdirler. Gyz maşgalasyna kiçilikden başlap, keser, darak ýaly haly gurallaryndan peýdalanmagyň ýollary öwredilipdir. Olar öz käbeleriniň, boýdaşlarynyň hereketini synlap, haly dokamagy öwrenipdirler. Şeýlelik bilen hem, türkmen maşgalasynda ýaşajyk halyçynyň uly geljegi başlanypdyr. Paýhasly ene-mamalarymyzyň ýürek mähri, irginsiz yhlasy siňen ajaýyp halylarymyz dünýä ýüzünde meşhur sungatdyr. Halylarymyz hem haly önümlerimiz üýtgeşik çeper eseri ýadyňa salýar. Nesilden-nesle geçip, asyrlar aşyp gelen türkmen halylarymyz döredijilik nusgasynyň mizemezligi bolup, ol nesiller üçin nusgalyk şamçyragdyr. Milli mirasymyzy aýawly saklamak we dünýä ýaýmak babatda alyp barýan beýik işleri bilen Watanymyzy berkararlyga, halkymyzy bagtyýarlyga besleýän Milli Liderimiz Gahryman Arkadagymyzyň, Arkadagly Serdarymyzyň janlary sag, ömürleri uzak bolsun! 

Aýsoltan HUDAÝNAZAROWA,

Türkmen oba hojalyk institutynyň 
Agronomçylyk fakultetiniň 
Ýyladyşhana hojalygy hünäriniň
3-nji ýyl talyby.