Berkarar döwletiň täze eýýamynyň Galkynyşy döwründe eziz ýurdumyzda medeniýet hem sungat uly özgerişliklere eýe bolýar. Gahryman Arkadagymyzyň «Medeniýet halkyň kalbydyr» diýip belleýşi ýaly, Arkadagly Serdarymyzyň başda durmagynda merdana ata-babalarymyzdan gelýän milli mirasymyzy dünýä ýüzüne açyp görkezmeklige giň ýol açyldy. Medeni gatnaşyklaryň ösdürilmegi netijesinde asyrlaryň dowamynda toplanyp, dilden-dile, kalpdan-kalba geçip gelen gymmatlyklarymyza täze öwüşgin çaýyldy. 2015-nji ýylda «Görogly» şadessanynyň, 2017-nji ýylda «Küştdepdi» milli aýdym we tans dessurynyň, türkmen halyçylyk sungatynyň we beýleki milli gymmatlyklarymyzyň ÝUNESKO-nyň Adamzadyň maddy däl medeni mirasynyň sanawyna girizilmegi medeni mirasymyza bolan sarpanyň has hem artýandygynyň aýdyň subutnamasydyr. Milli aýratynlyklarymyzyň biri bolan küştdepdi tansy medeniýetimiziň aýrylmaz bölegidir. Bu tans dessurynyň taryhy kökleri gadymyýetden gözbaş alyp gaýdýar. Ol asyrlarboýy kämilleşdirilen, owaz bilen güýçlendirilen hereket arkaly milli däpleriň ähmiýetini açyp görkezýär. Ony ýerine ýetirýänler döwre gurap, özboluşly hereketleriň sazlaşygyny emele getirýärler. Ol halkyň milli häsiýeti bilen umumylaşýar. Maddy däl medeni mirasy saklap galmak boýunça Hökümetara komitetiniň 2017-nji ýylyň 7-nji dekabrynda Koreýa Respublikasynyň Çeju şäherinde geçirilen 12-nji mejlisinde teklip edilen «Küştdepdi» aýdym we tans dessury ÝUNESKO-nyň Adamzadyň maddy däl medeni mirasynyň sanawyna girizildi. Munuň özi türkmen halkynyň umumadamzat medeni mirasynyň aýrylmaz bölegi bolan ruhy medeniýetiniň ähmiýetiniň halkara derejesinde ykrar edilmegidir. Milletiň taryhy-medeni ýörelgeleriniň we ruhy tejribesiniň sazlaşygyny beýan edýän halk döredijiliginiň özboluşly nusgasy bolan küştdepdi geçmiş ýörelgeleriniň we häzirki döwrüň döredijilik joşgunynyň sazlaşykly utgaşmasydyr. 

Firuza DOSÇANOWA,

Türkmen oba hojalyk institutynyň 1-nji ýyl talyby.