Mary welaýatynyň oba hojalyk önümçilik birleşiginiň garamagyndaky maldarçylyk hojalyklarynyň sähra merdanlary uzak örülerde bolmak bilen, mallary dok we ýyly gyşladýarlar. Birleşigiň garamagyndaky «Üçajy» maldarçylyk hojalygynyň 44 müň 898 baş dowara ýadawsyz hyzmat edýän çopan-çoluklary mallaryny Garagum çölüniň günorta-gündogar ýaýlalarynda, şeýle hem Garagum derýasynyň çep kenaryna golaý, ot-çöpüň bol ýerlerinde bakýarlar.

Jogapkärli möwsüme 2 müň 844 tonnadan gowrak ätiýaçlyk otuny ýygnap, gyş agyllaryny birkemsiz taýýarlan maldarlar mallary orta we ýokary semizlikde saklaýarlar. Hojalygyň maldarlary öňümizde duran owlak-guzy möwsümine-de häzirden ykjam taýýarlyk görýärler. Munuň üçin bolsa owlak-guzy alynjak örüleri saýlap-seçýärler hem-de agyllary taýýarlamak işlerini alyp barýarlar.