Golaýda, Türki medeniýetiň halkara guramasy (TÜRKSOÝ) tarapyndan, Azerbaýjan Respublikasynyň Şuşa şäherinde «Harybülbül» halkara aýdym-saz festiwaly guraldy. Festiwala Türkmenistandan, Azerbaýjandan, Gazagystandan, Gyrgyzystandan, Wengriýadan, Moldowadan, Özbegistandan, Russiýadan we Türkiýeden döredijilik toparlary gatnaşdylar.

Festiwala biziň ýurdumyzdan «Laçyn» folklor topary, aýdymçylar Öwezgeldi Amanow, Bahargül Ezizowa, Myrat Aşyrow, Mansur Şaripow gatnaşyp, milli aýdym-saz sungatymyzy köpçülige ýaýdylar. Ýaňlanan şirin mukamlar, ýerine ýetirilen tanslar bu ýere ýygnanan özge ýurtlaryň sungat ussatlarynyň, hususan-da, doganlyk azerbaýjan halkynyň gyzgyn söýgüsine mynasyp boldy. «Köne güzer» «Ogulbeg», «Maral geldi» ýaly, biri-birinden şirin, belent heňdäki türkmen halk aýdymlary festiwala gatnaşyjylara ruhy joşgun paýlady.

Festiwal üstünliklere beslenip tamamlandy. Döredijilik toparymyzyň çykyşlaryna emin agzalary tarapyndan ýokary baha berildi. «Laçyn» iň gowy çykyş eden folklor topary bolmagy başardy we festiwalyň ýörite diplomyna mynasyp boldy. Mundan başga-da Maýsagül Eminowa, Öwezgeldi Amanow, Bahargül Ezizowa dagy dabara işjeň gatnaşyp, sahnada görkezen ussatlygy üçin diplomlar bilen sylaglandy.