Türkmenistanyň Söwda-senagat edarasynyň binasynda Eýran Yslam Respublikasynyň «Iran Agrofood» atly ýöriteleşdirilen sergisi we türkmen-eýran işewürlik maslahaty geçirildi. Iki goňşy ýurduň arasyndaky söwda-ykdysady gatnaşyklary has-da ösdürmäge gönükdirilen bu çäreler hyzmatdaşlygyň täze mümkinçiliklerini döretmekde möhüm orny eýeledi.

Eýran tarapyndan guralan «Iran Agrofood» sergisine 60-a golaý kompaniýa gatnaşyp, oba hojalyk, azyk senagaty, himiýa, logistika we gaplaýyş önümçiligindäki iň täze önümlerini hödürlediler. Üç gün dowam eden sergide azyk önümçiligine aýratyn üns berildi.

• Süýt we süýji önümleri: «Ashuradeh Dairy», «Golestan Sabah Dairy» ýaly kompaniýalaryň önümleri uly gyzyklanma döretdi.
• Gaplama we konserwirlenen önümler: «Mashhad Asana Behrouz» kompaniýasynyň dürli miwelerden taýýarlanan mürepbeleri, «Tabriz Pack» kompaniýasynyň çap etme we gaplama hyzmatlary aýratyn üns çekdi.
• Dermanlyk ösümlikler we melhemler: «Behchino» kompaniýasynyň ösümliklerden taýýarlanan melhemlik içgileri we çaýlary myhmanlaryň uly gyzyklanmasyna sebäp boldy.

Obasenagat pudagynda bolsa «Moghan Agro-Industry and Livestock Co.» we «Goldane Sahra» ýaly iri kompaniýalar öz önümlerini görkezip, maldarçylyk we oba hojalyk ekinleriniň önümçiligindäki tejribelerni paýlaşdylar.

Serginiň çäklerinde geçirilen işewürlik maslahaty iki ýurduň söwda-ykdysady gatnaşyklarynyň geljegini ara alyp maslahatlaşmak üçin giň platforma boldy. Duşuşyga türkmen we eýran döwlet edaralarynyň, hususy kärhanalaryň hem-de kiçi we orta telekeçileriň wekilleri gatnaşdylar.

• Söwda gatnaşyklary: Iki ýurduň arasynda söwda dolanyşygyny giňeltmegiň we täze eksport-import ugurlaryny kesgitlemegiň mümkinçilikleri ara alnyp maslahatlaşyldy.
• Oba hojalygy we azyk senagaty: Eýranly işewürler oba hojalygynda täze tehnologiýalary ornaşdyrmakda hyzmatdaşlygy güýçlendirmegi teklip etdiler.
• Telekeçilik gatnaşyklary: Hususy pudaklaryň gatnaşygyny giňeltmek we iki ýurduň telekeçileriniň arasynda göni gatnaşyklary işjeňleşdirmek meseleleri ileri tutuldy.

 Bu hyzmatdaşlyk diňe bir söwda-ykdysady ösüşi däl, eýsem, iki halkyň arasyndaky dostlukly gatnaşyklary hem pugtalandyrýar. Türkmenistan goňşy ýurtlary bilen ýakyn gatnaşyklaryny has-da ösdürmek bilen, sebitleýin durnuklylygyň we ösüşiň ýakyn hyzmatdaşyna öwrülýär.

Arzuw Bagtyýarowa
S.A.Nyýazow adyndaky Türkmen oba
hojalyk uniwersitetiniň Weterinar
Lukmançylygy fakultetiniň 2-nji ýyl talyby.