Ýakynda, Türkmenistanyň Hytaý Halk Respublikasyndaky ilçihanasy Atçylyk senagaty boýunça hytaý assosiasiýasynyň, Hytaýyň medeni, ylmy we işewürlik toparlarynyň wekilleriniň gatnaşmagynda çäre gurady. Çäre türkmen akyldary Magtymguly Pyragynyň doglan gününiň 300 ýyllygyna bagyşlandy.

Çäräni Türkmenistanyň Hytaý Halk Respublikasyndaky Adatdan daşary we Doly ygtyýarly ilçisi açdy we şahyryň döredijiligi barada gysgaça gürrüň berdi. Şeýle hem ýurdumyzda 2024-nji ýylda Magtymguly Pyragynyň 300 ýyllygyny giňden bellemäge taýýarlyk görülýändigini aýtdy. Şunuň bilen baglylykda, ilçi myhmanlary şu mowzukda bilelikdäki halkara maslahatlary geçirmäge, dürli neşirleri, ylmy barlaglaryň netijelerini çap etmäge ýardam bermäge, şeýle-de Pyragynyň Hytaý we türkmen bedewleri barada söz açylýan şygyrlaryny hytaý diline terjime etmäge işjeň gatnaşmaga çagyrdy.