Senagatçylar we telekeçiler birleşmesiniň agzasy «Uly höwes» hojalyk jemgyýetiniň Daşoguz welaýatynyň Şabat etrabynyň çäginde döwlet tarapyndan uzak möhletleýin bölünip berlen 3 gektar ýer böleginde döwrebap ýyladyşhana ýerleşip, ol ýerde ýaşlaryň 40-a golaýy yhlasly zähmet çekýärler. Ýyladyşhana Ýewropa döwletleriniň iň kämil tehnologiýaly enjamlary bilen enjamlaşdyrylyp, gündelik ulanylýan azyk önümleriniň hataryna girýän pomidory ösdürip ýetişdirmäge niýetlenendir.

Şoňa görä-de, häzirki wagtda bu ýerde giňden ýaýran «altess» görnüşli pomidorlar ýetişdirilýär. Bu pomidorlaryň bitginli we bol hasyl bermegi ugrunda yhlaslaryny gaýgyrmaýan işçi-hünärmenler ekini dökünleme, suwarma işlerine aýratyn üns berýärler. Degişli işleriň agramly bölegini awtomatik usulda amala aşyrmaga mümkinçiligiň bolmagy netijeliligi ýokarlandyrýar. Şeýlelikde, döwrebap ýyladyşhanada ösdürilip ýetişdirilýän pomidorlar içerki sarp edijilere ugradylmak bilen, alynýan bol hasylyň her aýda 80-100 tonnasy Russiýa eksport edilýär.