Türkmen halky Milli bahar baýramy — Halkara Nowruz gününi uly şatlyk bilen garşylady. Esasy dabaralar däp bolşy ýaly, Ahal welaýatynyň “Nowruz ýaýlasynda” geçirildi. Gadymy döwürlerden bäri Nowruz tebigatyň janlanmagyny we täze başlangyçlary alamatlandyrýar. ÝUNESKO tarapyndan adamzadyň maddy däl medeni mirasynyň sanawyna girizilen bu baýram halklaryň dostlugyny we medeni gatnaşyklaryny pugtalandyrmaga uly goşant goşýar.

Hormatly Prezidentimiziň belleýşi ýaly, Türkmenistanyň hemişelik Bitaraplygynyň 30 ýyllygyna gabat gelen bu ýyl Nowruzyň ähmiýeti has-da ýokarlandy. Şu günki dabaralarda halkymyzyň parahatçylyk, dostluk we ynanyşmak däplerine esaslanýan baý medeni mirasy wasp edildi. “Nowruz ýaýlasynda” folklor-etnografik sahna eserleri görkezilip, milli senetçilik we amaly-haşam sungatynyň ajaýyp nusgalary sergilendi. Türkmen halylary, keşdeçilik we zergärçilik sungaty bilen birlikde, milli tagamlaryň we däp-dessurlaryň özboluşlylygy myhmanlara tanyşdyryldy.

At çapyşyk, hiňňildik uçmak, folklor çykyşlary we sahnalaşdyrylan oýunlar baýramçylyk dabarasynyň ruhuny has-da belende göterdi. Ahalteke bedewlerine atlanan çapyksuwarlar öz ussatlygyny görkezip, ýurdumyzyň atçylyk sungatynyň şöhratyny has-da beýgeltdiler.

Baýramçylyk çäreleri diňe bir “Nowruz ýaýlasynda” däl, eýsem, Arkadag şäherinde we welaýatlardaky “Türkmeniň ak öýi” binalarynyň öňünde hem geçirildi. Nowruz dünýä halklarynyň özara düşünişmegini we hyzmatdaşlygyny berkitmäge çagyryş bolup, Türkmenistanyň parahatçylyk we ynanyşmak syýasatynyň dabaralanmagynyň nyşanyna öwrüldi.

Begençgeldi GUWANJOW,

Türkmenistanyň Daşary işler ministrliginiň
Halkara gatnaşyklary institutynyň talyby.