Ýurdumyzda Halkara Bitaraplyk güni mynasybetli dürli çäreler geçirilýär. Olaryň arasynda awtomobil sporty boýunça ýaryşlar aýratyn orna eýe boldy. Şu ýylyň 2-3-nji dekabrynda Garagum sährasynyň çäklerinde «Rally-reýd» görnüşi boýunça Türkmenistanyň çempionaty geçirildi.

Bäsleşik Garagum sährasynyň Ahal we Balkan welaýatlaryna degişli çäklerinde geçirildi. Gatnaşan toparlar umumy uzynlygy 161 kilometr bolan aralygy geçdiler. Bu aralyk iki güne bölünip, 138 kilometri 2-nji dekabrda, galan 23 kilometri bolsa 3-nji dekabrda geçildi.

Bu ýaryş Türkmenistanyň Awtomobil sport federasiýasynyň hem-de Bedenterbiýe we sport baradaky döwlet komitetiniň goldawy bilen guraldy. Şeýle çäreler ýurdumyzda awtomobil sporty ýaly döwrebap sport görnüşiniň ösmegine we ýokary derejeli türgenleriň taýýarlanmagyna döwlet derejesinde uly üns berilýändigini görkezýär.

Ýaryşa Türkmenistanyň Içeri işler ministrliginiň, «Türkmenawtoulaglary» agentliginiň we Türkmenistanyň Awtomobil sport federasiýasynyň ýygyndy toparlary gatnaşdylar. Bäsleşik T2 we açyk klas ýaly dürli derejelerde geçirildi.

Toparlar sport ulaglaryna ussatlyk bilen erk edip, çylşyrymly ýol şertlerinde kesgitlenen aralygy ýokary derejede geçmegi başardylar. Esasan-da, «Nissan Patrol», «Mitsubishi Pajero» we «Toyota Hilux» kysymly awtoulaglarda çykyş eden türgenler iň gowy netije görkezdiler.

Ýeňijiler

T2 klas boýunça ýeňijiler:

M.Toýlyýew («Türkmenawtoulaglary» agentligi) – 1-nji orun

M.Daňatarow (Awtomobil sport federasiýasy) – 2-nji orun

M.Abdullaýew (Awtomobil sport federasiýasy) – 3-nji orun

Açyk klas boýunça ýeňijiler:

Ç.Çaryýew («Toyota Hilux») – 1-nji orun

S.Kulalyýew (Awtomobil sport federasiýasy) – 2-nji orun

Ý.Abaýew (Awtomobil sport federasiýasy) – 3-nji orun

Ýeňijilere mynasyp sylaglar dabaraly ýagdaýda gowşuryldy.

Bu ýaryş awtomobil sportunyň ösdürilmeginde möhüm waka bolup, ýaşlaryň arasynda sportuň bu görnüşine bolan gyzyklanmalaryň artmagyna itergi berdi. Şeýle çäreler sportuň ähli görnüşlerini ösdürmekde, türgenleriň başarnyklaryny ýokarlandyrmakda aýratyn ähmiýetlidir.

Ýagşygeldi Atalykow,
Türkmenistanyň Telekommunikasiýalar we informatika institutynyň 2-nji ýyl talyby.