GDA-nyň Ýerine ýetiriji komitetiniň goldaw bermeginde Ýolçularyň hökümetara geňeşi tarapyndan guralýan «Dostluk kerweni» atly iki hepdelik halkara awtoulagly ýöriş Täjigistanyň, Özbegistanyň, Türkmenistanyň, Eýranyň we Ermenistanyň çäginden geçer.

Gatnaşyjylar iki hepdede 4000 km deň bolan ýoly geçerler. Ýöriş 24-nji aprelde Duşenbeden başlap, 10-njy maýda tamamlanar.

Halkara awtoulagly ýörişe gatnaşyjylar Aýni—Penjikent—Täjigistanyň Özbegistan bilen araçägi- Samarkant— Nawoýi—Buhara— Özbegistanyň Türkmenistan bilen araçägi— Türkmenabat—Mary—Aşgabat—Türkmenistanyň Eýran bilen araçägi—Maşat—Tus—Nişapur—Gorgan—Sori—Tähran—Tebriz—Eýranyň Ermenistan bilen araçägi—Megri—Kapan—Ýerewan ugurlary boýunça hereket ederler.

Ýörişiň barşynda Duşenbe, Samarkand, Aşgabat, Tähran we Ýerewan ýaly şäherlerde ýurtlaryň arasyndaky dostlukly gatnaşyklary pugtalandyrmaga gönükdirilen halkara ylmy-amaly maslahatlar we seminarlar geçiriler.

Ýeri gelende belläp geçsek, halkara awtoulagly ýörişiň gatnaşyjylaryny kuboklar, medallar, diplomlar, hormat hatlary, şeýle hem Ýolçularyň hökümetara geňeşiniň, GDA-nyň ýerine ýetiriji komitetiniň sylaglary we halkara awtoulagly ýörişini goldaýan jemgyýetçilik, pudaklaýyn guramalaryň, edaralaryň beýleki sylaglary bilen sylaglarlar. 

Yhlas HOJAMYRADOW,

Türkmen döwlet binagärlik-gurluşyk
institutynyň talyby.