Ýakynda,  Gökdepe etrabynyň Yzgant şäherçesiniň Mälikguly Berdimuhamedow adyndaky Medeniýet köşgünde «Kak daragyň, batly ýaňlansyn sesi» ady bilen welaýat derejesinde geçirilen baýramçylyk dabarasy täsirliligi bilen tapawutlandy.

Baýramçylyk dabarasyna gatnaşyjylar — çeper elli halyçy gelin-gyzlar, mährem eneler, jemgyýetçilik guramalarynyň wekilleri, ilki bilen, toý ruhundaky eýwanda guralan sergini synladylar. Deňi-taýy bolmadyk gadymy halylaryň nusgalary, häzirki zaman haly önümleri, sowgatlyk halyçalar, halyçylyk senedine degişli esbaplardyr serişdeler baýramçylyk sergisine özboluşly öwüşgin goşdy. Aýdym-sazyň hoş owazly çykyşlaryna ulaşan toý dabarasyna gatnaşan çeper elli halyçylara gymmat bahaly sowgatlaryň gowşurylmagy olaryň baýramçylyk şatlygyny goşalandyrdy.