Gökdepe şäherindäki Medeniýet köşgünde Türkmenistanyň Prezidentiniň “Türkmeniň Altyn asyry” atly baýragyny almak ugrundaky bäsleşigiň çäginde zehinli çagalaryň arasynda yglan edilen, «Garaşsyzlygyň merjen däneleri» atly aýdym-saz bäsleşiginiň Ahal welaýat tapgyry geçirildi. Bu tapgyrda welaýatyň dürli ýerinden bagtyýar çagalar we çagalar döredijilik toparlary gatnaşdy.

Şanly Garaşsyzlygymyzyň şanly 31 ýyllygyna bagyşlanan aýdym-saz bäsleşiginiň welaýat tapgyryna gatnaşyjy zehinli çagalar we döredijilik toparlary gezekli-gezegine sahna çykyp, mahmal owazly, belent mukamly joşgunly aýdym-sazlary, tans çykyşlaryny ýerine ýetirdiler, zehin başarnygyny görkezdiler. Çagalaryň sungat baýramçylygyna öwrülen aýdym-saz bäsleşiginiň ýeňijileri kesgitlenip, olara ýörite taýýarlanan sowgatlar gowşuryldy.