Türkmenistanyň Mejlisiniň karary bilen 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» diýlip yglan edilmegi döwletimiziň taryhynda möhüm tapgyry alamatlandyrýar. Bu ýyl döwlet Garaşsyzlygymyzyň 35 ýyllygynyň bellenilmegi bilen utgaşyp, milli ösüş strategiýasynyň täze mazmun bilen baýlaşdyrylýandygyny görkezýär. Ýylyň şygary diňe bir dabaraly söz düzümi bolman, eýsem döwlet syýasatynyň esasy ugurlaryny jemleýän konseptual beýany hökmünde çykyş edýär.

Şygar üç esasy binýady özünde jemleýär: garaşsyzlyk, hemişelik bitaraplyk we ösüşe okgunlylyk. Garaşsyzlyk döwletimiziň syýasy, ykdysady we medeni taýdan özbaşdak ösüş ýoluny saýlap alandygyny aňladýar. Bitaraplyk bolsa halkara gatnaşyklarda parahatçylyk, deňhukukly hyzmatdaşlyk we özara hormat ýörelgelerine ygrarlylygy görkezýär. Bu iki düşünje ýurdumyzyň dünýä giňişligindäki ornuny kesgitleýän strategik ýörelgelerdir.

«Bedew batly at-myradyň mekany» diýen beýanynda milli ruh, taryhy miras we ösüşe bolan ynam jemlenýär. Türkmen halky üçin bedew diňe bir milli baýlyk däl, eýsem erkinligiň, güýç-kuwwatyň we maksada okgunlylygyň nyşanydyr. Şol sebäpli ýylyň şygarynda bedewiň keşbiniň ulanylmagy döwletimiziň ösüş ýolunyň depginini, öňde goýlan beýik maksatlara ýetmekdäki tutanýerliligini alamatlandyrýar.

2026-njy ýylyň şygary ykdysadyýetiň diwersifikasiýalaşdyrylmagyny, sanly tehnologiýalaryň giňden ornaşdyrylmagyny, ylym-bilim ulgamynyň ösdürilmegini hem-de ýaşlaryň mümkinçilikleriniň giňeldilmegini göz öňünde tutýan giň gerimli maksatnamalaryň ideologik binýady bolup hyzmat edýär. Şeýle-de milli medeni mirasy gorap saklamak, däp-dessurlary dünýä derejesinde wagyz etmek, halkara hyzmatdaşlygy ösdürmek ýylyň möhüm ugurlarynyň hataryna girýär.

Netijede, 2026-njy ýylyň şygary döwletimiziň durnukly ösüş ýolunyň, milli gymmatlyklara ygrarlylygynyň we dünýä bilen hyzmatdaşlyk etmäge açyklygynyň aýdyň beýanydyr. Ol halkymyzy täze üstünliklere ruhlandyrýan, ösüşiň bitewi konsepsiýasyny özünde jemleýän strategik ýol görkeziji hökmünde çykyş edýär.

Gülşen ÝALKYMOWA,

Lebap welaýatynyň Hojambaz etrabynyň
16-njy orta mekdebiniň mugallymy.