Ahal welaýaty
logo

Soňky täzelikler:
✦ Sanly ulgam - ösüşiň binýady ✦ ✦ Medeniýet hepdeligine badalga berildi ✦ ✦ Merkezi Aziýa ýurtlarynyň küştçüleri «Aşgabat 2025» halkara ýaryşynda üstünlikli çykyş etdiler ✦ ✦ Galla - biziň baýlygymyz ✦ ✦ Parahatçylyk taglymaty - bitewüligiň binýady ✦ ✦ Türkmenistanyň ýokary okuw mekdepleriniň 14-si «THE Impact Rankings 2025» reýtingine goşuldy ✦ ✦ Milli zergärçilik sungaty bilen tanyşyldy ✦ ✦ Meýdan düşelgesindäki dabaraly çäre ✦ ✦ Türkmen sazlary Pekinde ýaňlandy ✦ ✦ Medeniýet, sungat, Magtymgulynyň döredijiligi – milli gymmatlyklaryň hazynasy ✦
Baş sahypa / Şygryýet /"Gapma-garşylyk" Erazm Rotterdamskä öýkünme- Aşyrmät GARLYÝEW
  28.08.2023
321
"Gapma-garşylyk" Erazm Rotterdamskä öýkünme- Aşyrmät GARLYÝEW

Howaýylyk däl bi, seljerip sözüm,
Dünýäň her zadynyň tap iki ýüzün.

 

Samsyklyk gizlenýär astynda görküň,
Tagaşyksyzlykdan däl, suluwdan gorkuň.

 

Düşünmek kynam däl, bilseň saýgaryp,
Baý, garyp däl, baý-garyp däl, baý – garyp.

 

Masgara bolmakdan çekinmeýänler,
Soň geliň, şöhratym çekiň diýýärler.

 

Alymlygyň gujagynda akmaklyk,
Güýçlülige mahsus maýyp çykmaklyk.

 

Ynsaplylyk garyplygy gyssaýar,
Şady-horramlyk bar, diýmek gussa bar.

 

Düşünmek diýmeklik – köýmek diýmekdir,
Dostluk diýmek – duşmançylyk diýmekdir.

 

Bähbidiň goýnunda saklanýar zyýan,
Bimöçber hyruç bar süňňünde haýaň.

 

Öli ýaly bolup ýören adamlar,
Diriligiň bar lezzetin dadarlar.

 

Ýaşaýşyň goýnunda saklanýar biliň,
Ömrüň jemlenmesi, ahyry – ölüm.