Energetika pudagy häzirki zaman döwletleriniň ykdysady ösüşinde, jemgyýetçilik abadançylygynda we milli howpsuzlygy üpjün etmekde aýratyn ähmiýete eýe bolan strategik ulgamdyr. Energiýa çeşmeleriniň ygtybarly we durnukly üpjünçiligi önümçiligiň, ulag ulgamynyň, sanly tehnologiýalaryň we durmuş hyzmatlarynyň üznüksiz işlemegini üpjün edýär.

XX–XXI asyrlarda bolsa atom energetikasy, gaýtadan dikeldilýän energiýa çeşmeleri hem-de ýokary tehnologiýalara esaslanýan energetika ulgamlary ösdürilýär. Energetika pudagy birnäçe möhüm ugurlary öz içine alýar: Elektroenergetika – elektrik energiýasynyň öndürilişi, iberilişi we paýlanyşy; Nebit we gaz senagaty – energiýa çeşmeleriniň çykarylyşy, gaýtadan işlenilişi we eksporty;Ýylylyk energetikasy – ýylylyk energiýasynyň öndürilmegi we üpjünçiligi; Atom energetikasy – atom reaksiýalaryna esaslanýan energiýa önümçiligi; Gaýtadan dikeldilýän energiýa çeşmeleri – Gün, ýel, suw we biokütle energiýasy. Bu ugurlar biri-biri bilen arabaglanyşykda bolup, ýurtlaryň energetika howpsuzlygyny üpjün edýär.

Türkmenistanyň energetika pudagy ýurduň ykdysadyýetiniň esasy sütünleriniň biridir. Ýurdumyzyň baý tebigy gaz gorlary halkara energetika bazarynda möhüm ähmiýete eýedir. Hormatly Prezidentimiziň baştutanlygynda energetika ulgamyny döwrebaplaşdyrmak, täze önümçilik kuwwatlyklaryny döretmek we energetika serişdelerini diwersifikasiýa etmek boýunça giň gerimli işler alnyp barylýar.

Türkmenistanyň halkara gaz geçirijileri, elektrik energiýasynyň eksporty we gaýtadan dikeldilýän energiýa çeşmelerini ösdürmek boýunça taslamalary sebit we dünýä derejesinde möhüm hyzmatdaşlyga ýol açýar. Soňky ýyllarda ekologiýa howpsuzlygyny üpjün etmek maksady bilen gaýtadan dikeldilýän energiýa çeşmelerine uly üns berilýär. Gün we ýel energiýasy ekologiýa taýdan arassa bolup, howanyň hapalanmagynyň öňüni almaga kömek edýär. Bu ugurda alnyp barylýan taslamalar geljekde energetika pudagynyň durnukly ösüşini üpjün eder.

Energetika pudagy senagatyň ösmegine, täze iş orunlarynyň döredilmegine, ýaşaýyş derejesiniň ýokarlanmagyna we sosial infrastruktura hyzmatlarynyň kämilleşmegine gönüden-göni täsir edýär. Energiýa üpjünçiligi durnukly bolan ýurtlarda ykdysady ösüş hem yzygiderli bolýar.

Netijede, energetika pudagy döwletiň ösüş strategiýasynyň möhüm bölegi bolup durýar. Energiýa çeşmelerini tygşytly peýdalanmak, täze tehnologiýalary ornaşdyrmak we halkara hyzmatdaşlygyny ösdürmek häzirki döwrüň esasy talaplarydyr. Energetika ulgamynyň netijeli işlemegi ýurdumyzyň ykdysady kuwwatynyň artmagyna we halkymyzyň abadançylygynyň üpjün edilmegine hyzmat edýär.

Gunça BEGENJOWA,

Türkmenistanyň Döwlet energetika institutynyň
mugallymy.