Söweş sungatlarynyň garyşyk görnüşiniň türkmen ussady Döwletjan Ýagşymyradow (21-7-1) «PFL-2024» ligasynyň regulýar möwsümindäki ilkinji tutluşygyny geçirmäge taýýarlanýar. Onuň nobatdaky garşydaşy 8 ýeňşi hem-de 1 ýeňlişi bilen professional rekorda eýelik edýän 27 ýaşyndaky sloweniýaly söweşiji Jeýkob Nedo bolar.

34 ýaşly Ýagşymyradow bilen Nedonyň tutluşygy 12-nji aprelde Las-Wegasda (ABŞ-nyň Newada ştaty) geçer. Bu tutluşyk ähli gatnaşyjylaryň çempionlyk guşagy hem-de 1 mln amerikan dollaryna barabar bolan baýrak ugrunda oktagona çykjak ýaryşynyň — «PFL-2024» Gran-prisiniň bir bölegine öwrüler.

Ýeri gelende belläp geçsek, «Professional Fighters League (PFL)» Amerikanyň garyşyk söweş sungaty boýunça ýaryşlary geçirmäge ýöriteleşen öňdebaryjy guramasydyr.

«PFL» 2023-nji ýylyň noýabrynda Döwletjan Ýagşymyradowyň 2021-nji ýylyň aprelinden bäri çykyş edip gelýän «Bellator» guramasynyň bäsleşikleri üçin hukuk aldy. Promouşenleriň birikmeginden soň, «PFL-iň» esaslandyryjysy Don Dewis «Bellatoryň» öňki söweşijileriniň ählisiniň «PFL-iň» sanawynda boljakdygyny we guramanyň ýaryşlaryna hem-de beýleki çärelere gatnaşyp biljekdigini habar berdi.

Döwletjan Ýagşymyradowyň «Bellator 300-iň» çäginde geçiren ahyrky tutluşygynda polşaly M.Rozanskini ýeňendigini ýatladýarys.

Pälwan JUMADURDYÝEW,

Döwletmämmet Azady adyndaky
Türkmen milli dünýä dilleri
institutynyň talyby.