Oguzhan adyndaky «Türkmenfilm» birleşigi «Dolanaý» atly täze çeper filmde surata düşmek üçin, aktýor gözden geçirilişine gatnaşmaga çagyrýar. Filmiň taslamasy – taýýarlyk döwründe, bu barada guramaçylar habar berýär. Täze çeper filmiň baş gahrymany iki sany çylşyrymly ykbally gyzlar bolar we esasy wakalar häzirki paýtagtymyzda we onuň töwereginde bolup geçer. Çeper filmiň režissýory Arslan Eýeberdiýew.

Film synaglaryna gatnaşmak üçin jynsyna, ýaşyna, milletine, hünärine garamazdan, islendik adam ýüz tutup biler. Taslama üçin hasaba alnandan soň, oňa gatnaşýanlar filmden monologlaryň nusgalaryny alyp, surata düşürilýän meýdançada kameranyň öňünde okamaly bolarlar.

Synag üçin alnan parçalar wideoarhiw kinostudiýada saklanýar, şol sebäpli bu filme düşüp bilmeseňiz hem siziň arzalaryňyz başga taslamalar üçin göz öňünde tutulyp bilner.

Döredijilik synagyna gatnaşmak üçin, Oguzhan adyndaky «Türkmenfilm» birleşiginiň kasting merkezine ýüz tutmaly.

Habarlaşmak üçin telefon belgi: 49-37-01.