Ýurdumyzyň ähli ýerinde bolşy ýaly, Daşoguz welaýatynyň Boldumsaz etrabynda hem öz mellek ýerlerini, kömekçi hojalyklaryny netijeli ulanyp, ekerançylyk, maldarçylyk önümlerini öndürip, gowy girdeji gazanýan maşgalalar az däl. Aýratyn hem soňky döwürde bedene, käkilik, gaz ýaly guşlary, öý towşanlaryny köpeltmek bilen gyzyklanýanlar bu ugurda zähmet üstünliklerini gazanýarlar.

Boldumsaz etrabynyň Gubadag geňeşliginden Aşyr Töräýew öý towşanlaryny köpeltmekde baý tejribe toplan adamlaryň biri. Ol öý towşanlaryny idetmek bilen, gowy girdeji hem gazanýar. Öý towşanlaryny idetmek, köpeltmek bilen gyzyklanyp, onuň ýanyna gelýänler juda kän.

Şol etrabyň Bereketli geňeşliginden Durdynepes Posmanow hem ençeme ýyllardan bäri towşan idedip gelýär. Indi onuň hem köp sanly şägirtleri bar. Onuň göreldesine eýerýänleriň sany bolsa barha artýar.

Durdynepes diňe bir towşanlaryň sanyny köpeltmek bilen meşgullanman, eýsem, olaryň tohumçylygyny gowulandyrmak barada hem aladalanýar. Soňky döwürde towşan idedijiler onuň «gigant» ýaly görnüşlerini köpeltmeklige aýratyn uly üns berýärler.