Türkmenistanyň Beýik Britanýanyň  we Demirgazyk Irlandiýanyň Birleşen Patyşalygyndaky ilçisi “British Library” kitaphanasynyň ýolbaşçylary bilen duşuşyk geçirdi. Duşuşugyň esasy maksady bolsa “British Library” kitaphanasynda saklanýan Magtymguly Pyragynyň  golýazmalarynyň asyl nusgasyndan ybarat boldy.

Atavatan-turkmenistan.com  habar saýtynyň bellemegine görä,  türkmen diplomat Ý.Serýaýew kitaphanyň Halkara aragatnaşyklar boýunça direktory Marsiel  Hopkins bilen duşuşyp,   Magtymguly Pyragynyň  golýazmalarynyň asyl nusgasynyň göçürmeleri  bilen tanyş boldy. Duşuşygyň barşynda Ý.Sarýaýew  Türkmenistandan wekiliýetiň Beýik Britanýa gelip, akyldar şahyryň golýazmalarynyň nusgalasy bilen içgin tanyşmak mümkinçiklerini we Magtymguly Pyragynyň doglan güniniň 300 ýyllygyna bagyşlanyp düşüriljek dokumental filmde “British Library” kitaphanasynyň wekilleriniň işjeň gatnaşmagy boýunça meseleler aralyp maslahatlaşdylar.

Belläp geçsek, “British Library” kitaphanasy – 1973-nji  ýylda düýbi tutulyp, 170-200 million töweregi kitaplaryň, žurnallaryň, we beýleki neşirleri özünde saklamaga mümkinçiligi bolan halkara kitaphanadyr. Beýik Britanýanyň milli kitphanasy bolan “British Library” häzirki wagtda özüniň  elektron hyzmatyny, ýagny neşir çeşmelerini online görnüşinde hem peýdalanmaga mümkinçilik berýär.

Baýramgül ABDLNEBIÝEWA,
Türkmen Milli dünýä dilleri institutynyň
uly mugallymy.