Berkarar döwletimiziň täze eýýamynyň Galkynyşy döwründe hormatly Prezidentimiziň taýsyz tagallalary netijesinde ahalteke bedewleri milletimiziň buýsanjyna, egsilmez guwanjyna öwrüldi. Şu günler ýurdumyzyň ähli künjeklerinde bedew baýramyna bagyşlanan dürli çärelerdir, at çapyşyklary guralýar. Şeýle çäreleriň biride Tejen etrabynyň "Agalaň" oba medeniýet öýünde etrap häkimliginiň, medeniýet bölüminiň, hem-de jemgyýetçilik guramalarynyň bilelikde gurnamagynda "At – türkmeniň myrady" ady bilen aýdym-sazly baýramçylyk dabarasy geçirildi. Bu baýramçylyk dabarasyna ýaşuly nesliň wekilleri, edara-kärhanalaryň işgärleri, jemgyýetçilik guramalary, bilim işgärleri gatnaşdylar.

Türkmen bedewiniň baýramyna bagyşlanan dabarada etrap medeniýet bölüminiň aýdymçy-sazandalary, tans toparlary, çeper höwesjeňleri özleriniň ýörite taýýarlan aýdym-sazly çykyşlarynda bedewe şeýle belent sarpa goýulýan ýurdumyzda gamyşgulak ahalteke atynyň – gözellikde deňi-taýy bolmadyk, ynsan ýaly duýgur türkmen bedewiniň waspy ýetirildi. Çagalar sungat mekdebiniň çagalarynyň ýerine ýetiren „Bedew“ tansy hem-de deprekçiler toparynyň ýerine ýetiren sazlary hasam täsirli boldy. Türkmen bedewiniň baýramyna bagyşlanan dabarany görmek üçin bu ýere gelenlerde uly täsir galdyrdy.

Dabaranyň ahyrynda oňa gatnaşyjylar türkmeniň ahalteke bedewleriniň şan-şöhratyny dünýä ýaýan hormatly Prezidentimiziň janynyň sag, ömrüniň uzak, alyp barýan tutumly işleriniň elmydama rowaç bolmagyny arzuw etdiler.

Maral AKYÝEWA,

Türkmenistanyň Kärdeşler arkalaşyklaryny 
Ahal welaýatynyň Tejen etrap 
birleşmesiniň esasy hünärmeni.